प्रकाशित मिति : जेष्ठ ३, २०८२ शुक्रबार
अमेरिकाको न्यूर्याकमा रहेको लिबर्टी अन्तर्राष्ट्रिय विमानस्थलमा हुने उडानको सङ्ख्या घटाउने विषयमा सहमति जुटेको छ । तीन दिनसम्म चलेको बैठकमा सहमति जुटेको हो ।
न्यूर्याक मेट्रो क्षेत्र वरिपरि र अन्य अमेरिकी विमानस्थलहरूमा हालै देखिएको गम्भीर हवाई यातायात नियन्त्रण समस्याको पृष्ठभूमिमा संघीय उड्डयन प्रशासन (एफएए) ले यो ‘ढिलाइ घटाउने योजना’ सहितको बैठक आयोजना गरेको थियो।
बुधबारदेखि सुरु भई शुक्रबार सकिएको यस बैठकमा एयरलाइन्सहरूले न्यूयोर्क विमानस्थलमा कम उडान सञ्चालन गर्न सहमति जनाएका छन् । जसले ढिलाइ र रद्द हुने उडानहरू न्यूनीकरण गर्ने विश्वास गरिएको छ।
एफएएले विमानस्थलमा निर्माण कार्य सकिनु अघि अधिकतम २८ वटा विमान प्रति घण्टा अवतरण गर्न दिने प्रस्ताव गरेको छ। यो निर्माण कार्य दैनिक रूपमा जुन १५ सम्म चल्नेछ र वर्षको अन्त्यसम्म हरेक शनिबार पनि जारी रहनेछ।
निर्माण सकिएपछि अक्टोबर २५ सम्म अधिकतम अवतरण दर ३४ विमान प्रति घण्टा हुनेछ। अन्तिम निर्णय मे महिनाको अन्त्यसम्ममा हुने बताइएको छ।
‘एफएएले न्यूर्याक मा सेवा दिने सबै एयरलाइन्सहरूलाई बोलाएर ढिलाइ कसरी घटाउन सकिन्छ भन्नेबारे छलफल गरिरहेको अमेरिकी यातायात मन्त्री सीन डफीले कंग्रेसमा बताएका थिए।
यस बैठकमा युनाइटेड एयरलाइन्स, डेल्टा, जेटब्लु, अमेरिकन एयरलाइन्स, अलास्का एयरलाइन्स, स्पिरिट एयरलाइन्स र एलिजिएन्ट एयर सहभागी थिए। यी बैठकहरूमा एण्टिट्रस्ट नियमको पालना गर्न एयरलाइन्सहरूले विशेष प्रक्रियाहरू अनुसरण गर्नुपर्छ।
हाल अमेरिका भरि देखिएको हवाई यातायात नियन्त्रण संकटमा सञ्चार विच्छेद, दुर्घटना, साना विमान दुर्घटना र जनवरीमा वाशिङ्टन नजिकै भएको ६७ जनाको मृत्यु भएको मध्यआकाश दुर्घटना समेत समावेश छन्।
न्यूयोर्कका लागि भएको यो बैठक फिलाडेल्फिया स्थित ट्र्याकन हवाई नियन्त्रण केन्द्रमा स्टाफ अभावका कारण दुई हप्ता लामो ढिलाइ र रद्द भएको उडानको पृष्ठभूमिमा आयोजना गरिएको हो।
यस केन्द्रमा आवश्यक ३८ पेशेवर कन्ट्रोलरमध्ये हाल २४ मात्र कार्यरत छन् । जुन कुल आवश्यकको ६३ प्रतिशत मात्र हो। तीमध्ये १६ जना अर्को वर्ष न्यूर्याक फर्कने तयारीमा छन्।
यातायात मन्त्रालयले ट्र्याकनसहित सिंगो हवाई नियन्त्रण प्रणालीलाई आधुनिकीकरण गर्न थप लगानी गर्ने वाचा गरेको छ।
यसमा कपर तार प्रतिस्थापन गरेर फाइबर अप्टिक प्रयोग, स्र्टास प्रणालीमा उच्च ब्यान्डविथ कनेक्शन थप्ने र स्टाफ संख्यामा वृद्धि गरिने लगाएत रहेका छन ।