प्रकाशित मिति : श्रावण २४, २०८१ बिहीबार
लाखौं खर्चेर विनाभिसा मेक्सिकोबाट अमेरिका आएका नेपाली युवालाई परिवारको आग्रहमा नेपाल फिर्ता पठाइएको छ । न्युयोर्कमा बस्दै आएका २१ वर्षीय युवक अमन खानलाई नेपालमा रहेका परिवारको अनुरोधमा एनआरएनए अमेरिका र पर्वत सेवा समाज न्युयोर्क अमेरिकाको विशेष सहयोगमा अगस्ट ८ बिहिबार विहान कतार एयरलाइन्सको विमानमार्फत नेपाल पठाइएको पर्वत सेवा समाज न्युयोर्क अमेरिकाका महासचिव प्रकाश शर्माले जानकारी दिएका छन् ।
शर्माले खानलाई नेपाल पठाउन सहयोग गर्ने सबैलाई धन्यवाद दिएका छन् । खानलाई नेपाल पठाउने कार्यमा अर्जुन लामिछाने, किशोर लामिछाने, सुरेश पराजुली, श्याम मगरती लगायतले सहयोग गरेका थिए । अमन खान झण्डै डेढबर्ष अगाडि अमेरिका आएका थिए । उनी केहीमहिनादेखि बिरामी समेत रहेका थिए । २ छोरा र एक छोरी मध्ये जेठो छोरा अमन झण्डै डेढबर्ष अगाडि अघि टेक्सास हुदै अमेरिका प्रवेश गरेका थिए ।
गत अप्रिलमा उनी न्युयोर्कबाट मेरिल्याण्ड जाने क्रममा झण्डै २ साता बेपत्ता भएका थिए । पछि उनलाई प्रहरीले न्युजर्सीमा फेला पारेको थियो । उनले आफू मेरिल्याण्डमा आइसकेपछि लुटिएको र लुटेराहरुले मोबाइल, झोला लगायतका सबै सामानहरु लुटेकाले कसैलाई सम्पर्क गर्न नपाएको बताएका थिए ।
कसैको पनि नम्बर याद नभएकाले कसैलाई सम्पर्क गर्न नसकेको र पछि प्रहरीको सम्पर्कमा पुगेपछि एलियन नम्बर बताउँदा प्रहरीको त्यसको माध्यमबाट स्पोन्सरको सम्पर्क नम्बर फेला पारेपछि सम्पर्क हुन सकेको उनले जानकारी दिएका थिए । आफू लुटिएपछि सार्वजनिक बसहरु चढ्दै र हिड्दै उनी न्युजर्सीको इष्ट विन्डसर पुगेको बताएका थिए । पर्वतको कुश्मा नगरपालिका वडा नम्बर ५ वडगाउँ शिवालयका खान शुक्रबार काठमाडौं पुग्नेछन् ।
