२९ चैत काठमाडौं । लण्डन म्याराथनमा भाग लिने तयारीमा रहेका धावक गोपीचन्द्र पार्कीलाई केएल दुगडले १ लाख रुपैयाँ उपलब्ध गराउने भएको छ ।
नेपाल ओलम्पिक कमिटीमा बिहीबार भएको बिदाइ कार्यक्रममा केएल दुगडका प्रबन्ध निर्देशक कुमुद दुगडले तयारीका लागि १ लाख रुपैयाँ दिने घोषणा गरेका हुन् ।
वैशाख ९ गते आयोजना हुने लण्डन म्याराथनमा भाग लिन गोपी शुक्रबार त्यसतर्फ प्रस्थान गर्नेछन् । नवौं धारा नेपालगन्ज म्याराथनका विजेता गोपीलाई नेपालगन्ज म्याराथनले नेपाल रन यूकेको सहकार्यमा लण्डन म्याराथनमा सहभागिताको लागि निश्चित गराएको हो ।
विश्वमा शीर्ष स्थानका ६ म्याराथन मध्येको एक लण्डन म्याराथनमा गोपी पहिलो पटक भाग लिन लागेका हुन् । उनले यसअघि जर्मनीमा भएको बर्लिन म्याराथनमा पनि भाग लिइसकेका छन् ।
उनले लण्डन म्याराथनका लागि पछिल्लो ६ महिनादेखि तयारी गरिरहेको र उत्कृष्ट नतिजाका लागि प्रयास गर्ने बताएका छन् ।
