प्रकाशित मिति : असार २६, २०८२ बिहीबार
अमेरिकी विदेश मन्त्री मार्को रुबियोले बिहीबार मलेसियामा आयोजित आसियान (एसियाली राष्ट्रहरूको संघ) को विदेशमन्त्रीस्तरीय बैठकको अवसरमा रूसी विदेश मन्त्री सेर्गेइ लेभरोभसँग भेट गर्दै युक्रेन युद्ध अन्त्यमा पर्याप्त प्रगति नभएकोप्रति गहिरो निराशा व्यक्त गरेका छन्। यो वार्ता युक्रेनमा रुसले तीव्र आक्रमण गरिरहेको बेलामा भएको हो।
रुबियोले भने, “यो स्पष्ट र महत्वपूर्ण कुराकानी थियो।”
उनले ५० मिनेट लामो यो छलफलमा अमेरिकी राष्ट्रपति डोनाल्ड ट्रम्पले सार्वजनिक रूपमा उठाएको कुरा (रुस युद्ध अन्त्यका लागि अपेक्षित लचकता देखाउन असफल भइरहेको छ) लेभरोभलाई स्पष्ट रूपमा बताएका थिए।
राष्ट्रपति ट्रम्प, जो युद्ध चाँडै अन्त्य गर्ने वाचा गर्दै पुनः सत्तामा फर्किएका छन्, युक्रेन मुद्दामा आफ्नो दृष्टिकोण कडा बनाउन थालेका छन्। मंगलबार उनले युक्रेनलाई अमेरिकी रक्षात्मक हतियारको आपूर्ति पुनः सुरु गर्न आदेश दिएका थिए र त्यसको भोलिपल्ट पुटिनको शान्ति प्रस्तावलाई ‘अर्थहीन’ भन्दै आलोचना गरेका थिए।
ट्रम्पले रुसी तेल, ग्यास, युरेनियम र अन्य निर्यात खरिद गर्ने राष्ट्रहरूलाई लक्षित गर्दै ५०० प्रतिशतसम्मको भन्सार शुल्क प्रस्ताव गर्ने कानुन समर्थन गर्न सक्ने बताएका छन्। सो विधेयकबारे ट्रम्प प्रशासनले अमेरिकी सिनेटसँग छलफल गरिरहेको छ।
रुबियोले बताएअनुसार, लेभरोभसँगको कुराकानीमा रूसी पक्षबाट ‘नयाँ वा फरक दृष्टिकोण’ को प्रस्ताव आएको छ, जुन उनले फर्किएपछि ट्रम्पलाई प्रस्तुत गर्नेछन्। उनले भने, “अब हामीलाई एउटा स्पष्ट खाका आवश्यक छ कि कसरी यो द्वन्द्व अन्त्यतर्फ अघि बढ्न सक्छ।”
सोही दिन बिहान युक्रेनको राजधानी कीभमा रूसी ड्रोन र क्षेप्यास्त्र आक्रमण हुँदा हजारौं मानिसहरू रातभर बम आश्रयस्थलमा बस्न बाध्य भएका थिए। युक्रेनी राष्ट्रपति भ्लादिमिर जेलेन्स्कीका अनुसार, रूसी सेनाले १८ वटा क्षेप्यास्त्र र करिब ४०० ड्रोन प्रहार गरेका थिए। अघिल्लो रात रुसले कीर्तिमानी ७२८ ड्रोन प्रक्षेपण गरेको बताइएको छ। मस्कोले भने यसबारे कुनै प्रतिक्रिया दिएको छैन।
रुबियो र लेभरोभबीचको यो दोस्रो प्रत्यक्ष भेटवार्ता हो। उनीहरू फेब्रुअरीमा साउदी अरेबियामा पहिलोपटक भेटेका थिए, ट्रम्पको रूसी नेतृत्वसँग वार्ता पुनः सुरु गर्ने र समाधानतर्फको मार्ग पहिल्याउने प्रयासको रूपमा। त्यसयता, मे र जुन महिनामा दुवैबीच टेलिफोन संवाद पनि भएको थियो।
रुबियोको भेटपश्चात मस्कोले ट्रम्पको आलोचनालाई लिएर खासै प्रतिक्रिया दिएको छैन। क्रेमलिनले बुधबार भनेको छ, “हामी ट्रम्पका भनाइप्रति सहज छौं र अमेरिकासँग बिग्रिएको सम्बन्ध सुधार गर्न तयार छौं।”
यसैबीच, बुधबार इटालीको रोममा युक्रेन समर्थक राष्ट्रहरूको सम्मेलनमा ट्रम्पका युक्रेन मामिला विशेष दूत कीथ केलोगले राष्ट्रपति जेलेन्स्कीसँग भेट गरेका छन्।