प्रकाशित मिति : आश्विन २०, २०८१ आईतबार
प्रसिद्ध रुसी विपक्षी कार्यकर्ता इल्दार दादिन मारिएका छन । उनलाई भर्ती गर्ने समूह सिभिक काउन्सिलले दादिनको मृत्यु भएको पुष्टि गर्दै उनलाई वीरको रूपमा सम्झना गरको छ । दादिन युक्रेनको तर्फबाट आफनै देश बिरुद्ध लडिरहेका थिए ।
दादिनको खार्किभ क्षेत्रको उत्तरपूर्वी युक्रेनमा रूसी तोप हमलामा मृत्यु भएको हो । उनी र उनको स्वयमसेवी बटालियन फ्रीडम अफ रशिया लिजनका सैनिकहरू लडिरहेको स्थानमा तोप हमला भएको थियो ।
रुसमा राजनीतिक दमन तीब्र हुँर्दै गएको बेला इल्दार दादिन रुसमा शान्तिपूर्ण विरोध प्रदर्शनको लागि परिचित बनेका थिए । शान्तिवादीका रूपमा चिनिने दादिनले आक्रामकता, सामूहिक हत्या, यातना, बलात्कार र लुटपाटका कारण आफुले हतियार उठाएको बताएका थिए ।
उनले र अन्य रुसियालीहरूले भ्लादिमिर पुटिनलाई रोक्न असफल भएको र प्रहरीको हिंसा र जेलको धम्कीले आफूहरूलाई सडकबाट तर्साएको बताएका थिए ।
दादिन सन् २०२३ को जूनमा साइबेरियन बटालियनमा सामेल भए । त्यसपछि गत जाडोमा उनी फ्रीडम अफ रशिया लिजनमा स्थानान्तरण भए । दुबै युक्रेनी सशस्त्र बलको आधिकारिक हिस्सा हुन् ।
यस बटालियनका धेरै सदस्यहरू रुसी नागरिक हुन् । उनीहरुले युक्रेनलाई भ्लादिमिर पुटिनलाई पराजित गर्न सहयोग गर्ने आशा गरेका छन् । जसलाई पुटिनको शासन अन्त्य गर्ने पहिलो कदमका रूपमा हेरिएको छ ।
