प्रकाशित मिति : बैशाख ११, २०८२ बिहीबार
अमेरिकी राष्ट्रपति डोनाल्ड ट्रम्पले रूसी राष्ट्रपति भ्लादिमिर पुटिनमाथि युक्रेनको राजधानी किभमा घातक मिसाइल र ड्रोन आक्रमण गरेकोमा कडा आलोचना गरेका छन्।
यो आक्रमण ट्रम्पले रूस शान्ति सम्झौताको लागि ‘तयार’ रहेको बताएको केही समयपछि भएको थियो। रूसले तीन वर्षअघि युक्रेनमाथि आक्रमण गरेपछि किभमाथि भएको यो सबैभन्दा विनाशकारी आक्रमणमध्ये एक मानिएको छ।
ट्रम्पले आफ्नो ट्रुथ सोसल पोस्टमा लेखे, ‘म किभमाथि रूसी आक्रमणबाट खुसी छैन। यो आवश्यक थिएन र समय पनि धेरै खराब छ। भ्लादिमिर, स्टप !’
उनले थपे, ‘हप्तामा ५००० सैनिकहरू मरिरहेका छन्। शान्ति सम्झौता गरौं !’
यो सन्देश ट्रम्पले बुधबार ह्वाइट हाउसमा पत्रकारहरूसँग रूससँग शान्ति सम्झौताको सम्भावना रहेको बताएको एक दिनपछि आएको हो।
उनले भनेका थिए, ‘मलाई लाग्छ हामीसँग रूससँग सम्झौता छ।’ तर, ट्रम्पले युक्रेनी राष्ट्रपति भोलोदिमिर जेलेन्स्कीलाई सम्झौतामा बाधक भएको आरोप लगाएका थिए ।
‘जेलेन्स्कीसँग सम्झौता गर्नुपर्छ। मैले सोचें यो सजिलो हुनेछ, तर हालसम्म यो कठिन भएको छ’, ट्रम्पले ओभल अफिसमा भनेका थिए ।
ट्रम्पको यी टिप्पणीहरूको केही घण्टापछि रूसले किभमाथि आक्रमण गर्यो, जसमा कम्तीमा ८ जनाको मृत्यु र ७० जना घाइते भए।
युक्रेनी राष्ट्रपति जेलेन्स्कीले आक्रमणका कारण दक्षिण अफ्रिकाको भ्रमण छोट्याएर स्वदेश फर्कने बताए। उनले भने, ‘रूसले मानिसहरूलाई मारिरहेको छ र कठोर दबाब तथा जवाफदेहिताबाट बचिरहेको छ। धेरै विनाश भएको छ। उद्धार कार्य जारी छ।’