प्रकाशित मिति : १२ चैत्र २०८२, बिहिबार
फाइल । संयुक्त अरब इमिरेट्सको दुबईमा इरानी हमलापछि शारजाह शहरको औद्योगिक क्षेत्रको गोदामबाट निस्किएको धुवाँको कालो मुस्लो । तस्वीर स्रोत : अल्ताफ कादरी/एपी-रासस
संयुक्त अरब इमिरेट्स (यूएई)ले बिहीबार इरानबाट प्रक्षेपण गरिएका १५ वटा ब्यालिस्टिक क्षेप्यास्त्र र ११ वटा ड्रोनलाई आफ्नो हवाई प्रतिरक्षा प्रणालीमार्फत सफलतापूर्वक अवरोध गरी नष्ट गरेको जनाएको छ।
यूएईका अनुसार इरानको आक्रामक गतिविधि सुरु भएयता अहिलेसम्म कुल ३७२ वटा ब्यालिस्टिक क्षेप्यास्त्र, १५ वटा क्रुज क्षेप्यास्त्र र १,८२६ वटा ड्रोनलाई खसालिएको छ, जसले क्षेत्रीय तनाव उच्च स्तरमा पुगेको संकेत गर्छ ।
यसैबीच, अबुधाबीस्थित स्वेइहान स्ट्रिटमाथि अवरोध गरिएको एक इरानी ब्यालिस्टिक क्षेप्यास्त्रको भग्नावशेष खस्दा दुई जनाको ज्यान गएको पुष्टि भएको छ। मृत्यु हुनेमा एक पाकिस्तानी र एक भारतीय नागरिक रहेका छन्।
अधिकारिहरूका अनुसार उक्त घटनामा अन्य तीन जना घाइते भएका छन् भने केही सवारी साधनमा पनि क्षति पुगेको छ। स्थानीय प्रशासनले सर्वसाधारणलाई आधिकारिक र प्रमाणित स्रोतबाट मात्र सूचना लिन आग्रह गर्दै अफवाह र अपुष्ट जानकारी नफैलाउन चेतावनी दिएको छ।
युद्ध सुरु भएदेखि यूएईमा भएका आक्रमणका कारण ड्युटीमा रहेका दुई जना सशस्त्र बलका सदस्य तथा सेनासँग अनुबन्धित एक मोरक्कोका नागरिकको पनि मृत्यु भइसकेको छ। साथै पाकिस्तानी, नेपाली, बंगलादेशी, प्यालेस्टिनी र भारतीय नागरिकसहित आठ जना सर्वसाधारणको ज्यान गएको छ।
हालसम्म यी आक्रमणहरूमा कुल १६९ जना घाइते भएका छन्। घाइतेहरूको अवस्था सामान्यदेखि गम्भीरसम्म रहेको बताइएको छ, जसमा यूएईका नागरिक तथा विभिन्न देशका बासिन्दा समावेश छन्।
यूएईको रक्षा मन्त्रालयले देशमाथि आउने कुनै पनि खतराको सामना गर्न आफू पूर्ण रूपमा तयारी अवस्थामा रहेको जनाएको छ। मन्त्रालयले देशको सार्वभौमिकता, सुरक्षा र स्थायित्वको रक्षा गर्न प्रतिबद्ध रहेको समेत दोहोर्याएको छ।