प्रकाशित मिति : फाल्गुन १८, २०८१ आईतबार
बेलायतका प्रधानमन्त्री कीर स्टार्मरले युक्रेनलाई रूसबाट जोगाउने चार बुँदे योजना घोषणा गरेका छन् । युक्रेनसँग मिलेर युद्ध अन्त्य गर्ने पनि उनले बताएका छन ।
उनले ब्रिटेन, फ्रान्स र अन्य देशहरूले ‘इच्छाशक्ति को गठबन्धन’मा युक्रेनको समर्थनमा आफ्नो प्रयासहरूलाई बढाउने र अमेरिकालाई पनि यसमा सामेल गर्न खोज्ने बताए ।
युरोपका १८ देशका नेता , र युक्रेनका राष्ट्रपति भोलोदिमिर जेलेन्स्की सहितको सम्मेलनपछि स्टार्मरले इतिहासको गम्भीर मोडमा सबै पुगेको बताए ।
जेलेन्स्कीले युक्रेनलाई ‘बलियो समर्थन’महसुस भएको बताए । सम्मेलनले ‘युरोपीय एकता’ उच्च स्तरमा देखाएको उनले महशुष गरेको बताए ।
अमेरिकी राष्ट्रपति डोनाल्ड ट्रम्प र युक्रेनी नेता जेलेन्स्कीबीचको तनावपूर्ण ओभल वार्तापछि यो सम्मेलन भएको हो ।
वास्तविक शान्तिका र सुनिश्चित सुरक्षा प्राप्त गर्न युरोपका सबैदेश मिलेर अमेरिकासँग सहकार्य गर्न तयार रहेको सम्मेलनपछि जेलेन्स्कीले भनेका छन ।
युक्रेनलाई सैन्य सहायता प्रवाह जारी राख्ने र रूसमाथि आर्थिक दबाब बढाउने , कुनै पनि दीर्घकालीन शान्ति सम्झौताले युक्रेनको सार्वभौमिकता र सुरक्षा सुनिश्चित गर्नुपर्छ र युक्रेनले कुनै पनि शान्ति वार्तामा उपस्थित हुन पाउनुपर्छ भन्ने स्टार्मरको बुँदामा उल्लेख छ ।
त्यसैगरी युक्रेनको रक्षात्मक क्षमता बढाउने र युक्रेनमा सम्झौतालाई बचाउन र पछि शान्ति सुनिश्चित गर्न इच्छाशक्ति को गठबन्धन को विकास गर्नु पनि शान्ति सम्झौतामा उल्लेख गरिएको छ ।
कीर स्टार्मरले थप २ बिलियन अमेरिकी डलरको सहयोग पनि घोषणा गरे । जसले ५ हजार भन्दा बढी हवाई रक्षा मिसाइलहरू खरिद गर्न मद्दत पुर्याउनेछ ।
ट्रम्पसँग दीर्घकालीन शान्तिको तात्कालिक आवश्यकतामा सहमत छौं । अब हामीले एकसाथ यसलाई उपलब्ध गराउनुपर्नेछ,स्टार्मरले भनेका छन । स्टार्मरले अमेरिका अस्थिर साझेदार नभएको बताए ।