युएससीआईएसले एसाइलमका वर्क परमिटको अवधि घटाउँदा कम्तीमा १५ हजार नेपाली प्रभावित हुने

युएससीआईएसले एसाइलमका वर्क परमिटको अवधि घटाउँदा कम्तीमा १५ हजार नेपाली प्रभावित हुने भएका छन् । उनीहरुको हालको वर्क परमिटको म्याद सकिएपछि नविकरण गर्दा उनीहरुलाई अब जम्मा १८ महिनाकोमात्र वर्क परमिट प्रदान गरिने भएको छ । युएससीआईएसमा एसाइलम आवेदन पेन्डिङ भएका झण्डै ५ हजार र अध्यागमन अदालतमा एसाइलम पेन्डिङ रहेका झण्डै १० हजार नेपालीहरुले यो आधारमा अमेरिकामा वर्क परमिट प्राप्त गरेर काम गर्दै आएका छन् ।

डिसेम्बर ५, २०२५ वा त्यसपछि विचाराधीन वा दायर गरिएका आवेदनहरूका लागि प्रारम्भिक वर्क परमिट र नवीकरणको अधिकतम वैधता अवधि पाँच वर्षबाट घटाएर १८ महिना कायम गरिएको हो । तर डिसेम्बर ५ अगाडि नै ५ बर्षको वर्क परमिट प्राप्त गरिसकेकाहरुले भने तत्काल नविकरणको आवेदन दिनुपर्नेछैन । उनीहरुको एसाइलम पेन्डिङ रहँदासम्म त्यही वर्क परमिटले नै काम गर्नेछ । तर म्याद सकिएपछि नविकरण गर्दा भने उनीहरुले पनि १८ महिनाको वर्क परमिट पाउनेछन् ।

अगस्तसम्मको तथ्यांक अनुशार हाल अमेरिकाका अध्यागमन अदालतहरुमा नेपालीका ९ हजार ६ सय ५९ आवेदनहरु पेन्डिङ रहेका छन् । उनीहरु मध्य अधिकांशले पेन्डिङ एसाइलमका आधारमा अमेरिकामा वर्क परमिट प्राप्त गरेर काम गरिरहेका छन् । अध्यागमन अदालतमा पेन्डिङ हुने नेपालीहरुको संख्या न्युयोर्कको अध्यागमन अदालतमा मात्र ३ हजार ६ सय ७४ रहेको छ । सान फ्रान्सिस्कोमा १९ सय ९ र सान एन्टोनियोको अदालतमा १७ सय ७५ नेपालीका एसाइलम मुद्दाहरु पेन्डिङ रहेका छन् । यो संख्या कन्कर्डमा ३२६, डेनभरमा २७६, डलासमा २३४ र बाल्टिमोरमा १९३ रहेको छ ।

आफ्नो नीति पुस्तिका अपडेट गर्दै युएससीआईएसले एसाइलम लगायतमा आधारित वर्क परमिटको अधिकतम वैधता अवधिमा उल्लेख्य कटौती गरेपछि यी नेपालीहरु प्रभावित हुने भएका छन् । यो परिवर्तन विचाराधीन र भविष्यका आवेदनहरूमा तुरुन्तै लागू भएको छ । जसले गर्दा अमेरिकामा काम गर्न खोज्ने गैर नागरिकहरूको बारम्बार जाँच गर्न आवश्यक बनाउनेछ भने यो बढाइएको छानबिनले धोखाधडीलाई रोक्न र सम्भावित हानिकारक मनसाय भएका विदेशीहरूलाई पत्ता लगाउन मद्दत गर्ने अधिकारीहरूले बताएका छन् ।

यस अगाडि जुलाई २२, २०२५ बाट लागू हुने गरी टीपीएस र परोलमा रहेकाहरुको वर्क परमिटको वैधता अवधि बढीमा एक वर्ष वा एकबर्षभन्दा अगाडि नै परोल वा टीपीएसको अवधिको अन्त्य हुने भएमा उक्त मितिमा सिमित गरिएको थियो । शरणार्थीको रूपमा परोल गरिएका वा परोल दिइएका विदेशीहरू, टीपीएस दिइएका वा विचाराधीन टीपीएस आवेदन भएका विदेशीहरू, उद्यमी परोलका विदेशी दम्पत्तिका लागि वर्क परमिटको अवधि घटाइएको थियो ।

अक्टोबर ३० देखि युएससीआईएसले नवीकरणको लागि आवेदन दिँदा वर्क परमिटको अवधि स्वतः विस्तार गर्ने अभ्यासलाई अन्त्य गरिसकेको छ । अक्टोबर ३०, २०२५ वा सोभन्दा पछि दर्ता गरिएका आवेदनहरूमा स्वत नविकरण प्रदान गरिएको छैन ।

गतबर्ष अमेरिकामा म्याद सकिएका निश्चित प्रकारका वर्क परमिटको अवधि स्वतः ५४० दिन थप्ने नियम युएससीआईएसले घोषणा गरेकोमा ट्रम्प प्रशासनले त्यसलाई उल्टाएको हो । गतबर्षको अस्थायी अन्तिम नियमले म्याद सकिएका कैयन वर्क परमिटको अवधि १८० दिनबाट बढाएर ५४० दिन बनाएको थियो ।

युएससीआईएसको प्रतिवेदनअनुसार हाल वर्क परमिट आवेदनहरूको ठूलो मात्रा विचाराधीन छ। झण्डै १७ लाख वर्क परमिट आवेदनहरू निर्णयको पर्खाइमा छन्, जसमध्ये ९ लाख भन्दा बढी आवेदन ६ महिनाभन्दा बढी समयदेखि विचाराधीन छन्।