प्रकाशित मिति : आश्विन २५, २०८२ आईतबार
अमेरिकी नागरिकहरूका लागि मालीले १०,००० अमेरिकी डलर भिसा शुल्क जमानत लागू गरेको छ।
पश्चिम अफ्रिकी मुलुक भ्रमण गर्न जाने अमेरिकी नागरिकहरूले व्यापार र पर्यटन भिसाका लागि अधिकतम १०,००० डलर भिसा शुल्क बापत जमानत राख्नु पर्ने भएको हो।
मालीका अधिकारीहरूले बताएअनुसार, ट्रम्प प्रशासनले आफ्ना नागरिकहरूमाथि लगाएको भिसा शुल्क र जमानतको निर्णयको प्रतिरोधस्वरूप यो प्रावधान लागू गरिएको हो।
यो शुल्क अमेरिकाको सीमाको सुरक्षालाई मजबुत पार्ने र राष्ट्रिय सुरक्षालाई सुरक्षित गर्ने वासिङ्टनको प्रतिबद्धतालाई बलियो बनाउने उद्देश्यले लागू गरिएको अमेरिकी दूतावासले बताएको थियो।
तर मालीको परराष्ट्र मन्त्रालयले अमेरिकाले यो कदम एकपक्षीय रूपमा चालेको बताउँदै त्यसको जवाफस्वरूप मालीले पनि “उस्तै प्रकारको भिसा कार्यक्रम” अमेरिकी नागरिकहरूका लागि लागू गर्ने निर्णय गरेको जनाएको छ।
दुई देशबीच कूटनीतिक सम्बन्ध सुधार गर्ने प्रयास भइरहेका बेला भिसा सम्बन्धी नयाँ प्रावधान लागू भएका छन्।
गत जुलाईमा अमेरिकी अधिकारीहरूले आतंकवादविरुद्ध सहकार्य र आर्थिक साझेदारीका विषयमा छलफल गर्न मालीको भ्रमण गरेका थिए। जसमा मालीका सुन र लिथियम भण्डारमा पहुँचसम्बन्धी सम्भावित सम्झौताहरू पनि समावेश थिए।
तर सन् २०२१ मा मालीमा भएको सैन्य कू (सैन्य विद्रोह) पछि सम्बन्धमा तनाव आएको थियो।
गत हप्ता बुर्किना फासोको सैनिक सरकारले पनि अमेरिकी शरणार्थीहरूलाई लिन अस्वीकार गरेको थियो। जवाफमा अमेरिकाले त्यहाँको भिसा जारी गर्ने प्रक्रिया स्थगित गरेको थियो।
बुर्किना फासोका परराष्ट्र मन्त्री करामको जाँ-मारी ट्राओरेले अमेरिकी दूतावासको निर्णयलाई “ब्ल्याकमेल” को रूपमा आलोचना गरेका छन्। उनले तेस्रो देशका आप्रवासीहरूलाई स्वीकार गर्ने अमेरिकी प्रस्ताव अस्वीकार गरेका थिए।
ट्रम्प प्रशासनले आप्रवासन नियन्त्रण नीतिको भागस्वरूप अफ्रिकी देशहरूलाई देश निकाला गरिएका (डिपोर्ट गरिएका) आप्रवासीहरू पठाउने गन्तव्यको रूपमा प्रयोग गर्न थालेको छ।