काठमाडौं । हजारौं मारिने गरि ८ दशकअघि खसालिएको दुई आणविक बम त्रासदीको घटनालाई जापानले अहिलेपनि बिर्सिएको छैन । आणविक बम विकासबारेको विश्वचर्चित फिल्म ‘ओपनेहाइमर’ अन्ततः शुक्रबारदेखि जापानमा रिलिज भएको छ ।
विश्वब्यापी रिलिजको ६ महिनापछि क्रिस्टोफर नोलन निर्देशित फिल्म जापानमा प्रदर्शनमा आएको अन्तर्राष्ट्रिय संचारमाध्यमले जनाएका छन् । फिल्मको जापान रिलिजलाई लिएर महिनौं वहस चलेका थिए ।
यसअघि हिरोसिमा र नागासाकीमा सन् १९४५ मा बम खसालिएको वर्षगाँठ छेकोमा अन्य मुलुकमा भने रिलिज गरिएको थियो । एएफपीका अनुसार, टोकियोको सिन्जुकु जिल्लामा ओपेनहाइमरको पहिलो शो हेर्न मानिस झरीको पर्वाह नगरी टिकट लिन लाइनमा उभिएका थिए ।
गत वर्ष जापानमा भाइरल बनेको ‘बार्बेनहाइमर’ मेम्सले अनलाइनमा आक्रोश फैलाएको थियो । आलोचकले भने फिल्मले बमबाट हुने क्षतिलाई नदेखाएको तर्क गरेका थिए । ‘परमाणु हतियार भयावहताको अझ धेरै वर्णन र चित्रण हुन सक्थ्यो’ बम आक्रमणबाट बाँचेका हिरोशिमाका पूर्वमेयर ९६ वर्षीय ताकाशी हिराओकाले भने ।
सो घटनामा बाँचेका ८० वर्षीय मासाओ टोमोनागाले फिल्ममा फरक दृष्टिकोण राखे । नागासाकीमा भएको प्रिभ्यु कार्यक्रममा फिल्म हेरेपछि उनले भने, ‘मैले पिरमाणु बमबाट बाँचेका व्यक्तिको व्यक्तिको दृश्य नभएको हो कि भन्ने सोचेको थिएँ । वास्तवमा दर्जनौं दृश्यमा ओपेनहाइमरका केही दृश्यले म स्तब्ध बनेँ । परमाणु बम विष्फोट मेरो लागि पर्याप्त थियो ।’
यो फिल्म अमेरिकी भौतिकशास्त्री जे. रोबर्ट ओपेनहाइमर र वैज्ञानिकको टोलीको वरिपरि घुम्छ जब उनीहरूले शीर्ष गोप्य म्यानहटन परियोजनाको हिस्साको रुपमा पहिलो परमाणु बम विकास गर्न वर्षौं बिताएका थिए ।
क्रिस्टोफर नोलन निर्देशित यो फिल्मले यसवर्षको ओस्कार अवार्डमा उत्कृष्ट फिल्म, निर्देशक, अभिनेतासहितका ७ विधामा जितेको थियो । विश्वब्यापी ९५० मिलियन डलरभन्दा बढी कमाइ गरेको थियो ।
