प्रकाशित मिति : असार ४, २०८१ सोमबार
न्युयोर्क सिटीको तापक्रम मंगलबारदेखि झण्डै १ सय डिग्री फरेनहाइटको हाराहारीमा पुग्ने अनुमानसँगै न्युयोर्क सिटीको स्थानीय सरकारले यो बर्ष पहिलो पटक आपतकालीन योजना सक्रिय बनाउने भएको छ । गर्मी आपतकालीन योजना सोमबार बिहान ११ बजेबाट सक्रिय गरिएको छ । अत्याधिक गर्मीका कारण कूलिङ सेन्टरहरू मंगलबारदेखि खुला हुने भएका छन् ।
बिहीबार र शुक्रबार पारा अनुमानित ९९ डिग्रीसम्म पुग्नु अघि मंगलबार र बुधबार न्यूनतम ९० को दशकमा तापक्रम सुरु हुनेछ। मंगलबार जुन १८ देखि उच्च गर्मी हुने सम्भावना भएकाले न्युयोर्कवासीहरूलाई सावधानी अपनाउन आग्रह गरिएको छ। न्युयोर्क शहरको आपतकालीन व्यवस्थापन विभाग र स्वास्थ्य तथा मानसिक स्वच्छता विभागले राष्ट्रिय मौसम सेवाको पूर्वानुमानलाई उद्धृत गर्दै यो चेतावनी जारी गरेको हो ।
यो सिजनको पहिलो गर्मीको लहर हो । ताप सूचकांक एक वा बढी दिनको लागि १ सय डिग्री नाघेमा वा लगातार दुई वा बढी दिनहरूका लागि ९५ डिग्री नाघेमा न्युयोर्क सिटीले अत्यधिक गर्मी रूपमा परिभाषित गर्दै आएको छ ।
सिजनको पहिलो गर्मीको लहरलाई सामना गर्न न्युयोर्क सिटीसँग योजना रहेको मेयर एरिक आडम्सले बताएका छन् । सबै न्युयोर्कवासीहरूलाई गर्मीमा सावधान रहने योजना बनाउन उनले आग्रह गरेका छन् । तयार नभएको खण्डमा तातो लहर असहज भन्दा बढी हुन सक्ने तथा यो घातक र जीवनलाई खतरा हुन सक्ने मेयर आडम्सले चेतावनी दिएका छन् ।
तिर्खा नलागेपनि लगातार पानी पिउन र घरपालुवा जनावरहरूलाई हाइड्रेटेड राख्नको लागि जाँच गर्न प्रोत्साहन गरिएको छ । यस वर्ष न्युयोर्क सिटीले जनताका लागि उपलब्ध कूलिङ सेन्टरहरू संख्या पनि विस्तार गरेको छ । कूलिङ सेन्टरहरू मंगलबार बिहानदेखि बिहीबारसम्म खुला रहनेछन्। नजिकको कूलिङ सेन्टरहरू फेला पार्न यहाँ क्लीक गर्नुहोला वा ३११ मा फोन गर्नुहोला ।
उच्च गर्मीले सबैभन्दा कमजोर स्वास्थ्य भएका बासिन्दाहरूलाई खतरा उत्पन्न गर्दछ । ६० वर्ष माथिकाहरू, साना बालबालिकाहरू, र पहिले नै स्वास्थ्य समस्याहरु भएकाहरु बढी जोखिममा हुन्छन् । हृदय रोग, मधुमेह, मानसिक स्वास्थ्य समस्या भएकाहरु बढी जोखिममा हुन्छन् ।
बाहिर तातो हुँदा सुरक्षित र स्वस्थ रहनको लागि एयर कन्डिशनर चलाउनु उत्तम तरिका हो । तर जोखिममा रहेका केही व्यक्तिहरूले एयर कन्डिशनर प्रयोग गर्दैनन् वा खोल्दैनन्। एयर कन्डिशनर नभएका मानिसहरूले शितल राख्न अन्य विकल्पहरू पहिचान गर्नुपर्छ । एयर कन्डिशनर भएका पुस्तकालयहरू, मलहरू र संग्रहालयहरू जनताका लागि खुला छन्।
मंगलबारदेखि मध्यान्हदेखि बेलुका ८ बजेसम्म तापक्रम उच्च हुने अनुमान गरिएको छ । यद्यपि साँझमा थोरै राहत हुनेछ। राष्ट्रिय मौसम सेवाले बिहीबार र शुक्रबार गर्मीको चेतावनीहरु जारी गर्ने अपेक्षा गरिएको छ ।
