प्रकाशित मिति : चैत्र ३, २०८१ आईतबार
अमेरिकामा ट्रम्प प्रशासन संघीय सरकारी सञ्चार संस्था भ्वाइस अफ अमेरिकालाई बन्द गर्ने तयारीमा जुटेको छ ।
राष्ट्रपति डोनाल्ड ट्रम्पले संघीय सरकारी सञ्चार संस्था भ्वाइस अफ अमेरिकालाई कमजोर बनाउनका लागि तयार गरिएको आदेशमा हस्ताक्षर गरेका छन् । जसमा भ्वाइस अफ अमेरिकालाई ‘एण्टी ट्रम्प’ र ‘र्याडिकल’ भन्ने आरोप लगाइएको छ।
आदेशले ‘ट्याक्सपेयरको पैसामा र्याडिकल प्रचारको लागि खर्च गर्न नपर्ने’ सुनिश्चित गरेको छ । भ्वाइस अफ अमेरिकाको मुख्य कार्य रेडियो सेवा हो ।
दोस्रो विश्वयुद्धको समयमा नाजी प्रचारको जवाफमा यसको स्थापना गरिएको थियो । यसका कार्यक्रम विश्वभरका करोडौं मानिसहरूले सुन्ने गर्छन्।
भ्वाइस अफ अमेरिकाका निर्देशक माइक एब्राहमोजले १ हजार ३०० कर्मचारीहरूलाई तलबसहितको बिदामा राखिएको बताए । उनी आफैलाई पनि बिदामा राखिएको छ ।
आदेशले भ्वाइस अफ अमेरिकालाई यसको ‘महत्वपूर्ण मिशन’ पूरा गर्न असमर्थ बनाएको एब्राहमोजले बताएका छन ।
अमेरिकाका विरोधीहरू इरान, चीन र रूसले झूटो सुचनाहरु फैलाउन र अमेरिकालाई बदनाम गर्न अरबौं डलर खर्च गरिरहेको बेला भ्वाइस अफ अमेरिकालाई बन्द गर्ने तयारी गर्नु आफैमा हास्यस्पद रहेको उनले बताए ।
राष्ट्रपतिको आदेशले भ्वाइस अफ अमेरिकाको मातृ संस्था एजेन्सी फर ग्लोबल मिडिया लाई लक्षित गरेको छ । रेडियो फ्री युरोप र रेडियो फ्री एशियाजस्ता गैर नाफामूलक संस्थाहरूलाई यसले आर्थिक सहायता दिदै आएको छ ।
ट्रम्पका प्रमुख सल्लाहकार एलोन मस्कले आफ्नो सामाजिक मिडिया प्लेटफर्म X मार्फत भ्वाइस अफ अमेरिकालाई बन्द गर्नको लागि आह्वान गरेका छन्।
राष्ट्रपति ट्रम्पले आफनो पहिलो कार्यकालमा पनि भ्वाइस अफ अमेरिकाको आलोचना गरेका थिए।