प्रकाशित मिति : आश्विन २७, २०८२ मंगलबार
अमेरिकाले भेनेजुएलाको तट नजिक अर्को हवाई आक्रमण गरेको छ। आक्रमणमा परेर छ जनाको मृत्यु भएको राष्ट्रपति डोनाल्ड ट्रम्पले बताएका छन्।
ट्रम्पले ‘ट्रुथ सोसल’मा लेख्दै उक्त जलयान “नार्कोटेररिस्ट” अर्थात् लागूपदार्थ तस्करहरूको भएको र “तस्करी”मा संलग्न रहेको बताएका छन्।
यो आक्रमण सेप्टेम्बर महिनादेखि ट्रम्प प्रशासनद्वारा अन्तर्राष्ट्रिय पानीमा लागूपदार्थ तस्करीमा संलग्न भनिएका जलयानहरू माथि गरिएको पाँचौँ हवाई हमला हो।
आक्रमणमा अहिलेसम्म २७ जनाको मृत्यु भएको बताइएको छ। तर अमेरिकाले ती जलयान वा तीनमा रहेका व्यक्तिहरूको पहिचानबारे प्रमाण वा विवरण सार्वजनिक गरेको छैन।
कानुनविद्हरूले यस कदमलाई अन्तर्राष्ट्रिय कानुनको उल्लङ्घन भनेका छन्। छिमेकी देशहरू कोलम्बिया र भेनेजुएलाले पनि ती आक्रमणहरूको निन्दा गरेका छन्।
ट्रम्पले हवाई निगरानी भिडियो पनि सार्वजनिक गरेका छन्। भिडियोमा पानीमा सानो डुङ्गा देखिन्छ, त्यसपछि मिसाइलले हान्दा विस्फोट हुन्छ।
ट्रम्पले आक्रमणमा परेका व्यक्तिहरूको राष्ट्रियता खुलाएका छैनन्। न त उनीहरू कुन तस्करी समूहसँग सम्बन्धित थिए भन्ने स्पष्ट पारेका छन्। उनले कुनै पनि अमेरिकी सैनिक घाइते नभएको बताएका छन्।
यो आक्रमण अमेरिकी मिडियामा चुहिएको एउटा ज्ञापनपछि आएको हो, जसमा उल्लेख गरिएको थियो कि अमेरिकी प्रशासनले आफूलाई “नन-इन्टरनेशनल आर्म्ड कन्फ्लिक्ट” (अन्तर्राष्ट्रिय नभएको सशस्त्र द्वन्द्व) मा रहेको ठानेको छ — अर्थात्, ड्रग कार्टेलहरूसँग युद्धस्थितिमा रहेको।
अमेरिकाले क्यारिबियन क्षेत्रमा धेरै युद्धपोतहरू पनि तैनाथ गरेको छ। अमेरिकाले यी आक्रमणहरूलाई “आत्मरक्षाको कार्य” भनेर व्याख्या गरेको छ, तर धेरै कानुनी विशेषज्ञहरूले यसलाई अवैध सैन्य कारबाही ठानेका छन्।
विश्लेषकहरूका अनुसार ट्रम्प प्रशासनले यसलाई युद्धस्थितिको रूपमा प्रस्तुत गरेर “युद्धकालीन अधिकार” प्रयोग गर्न खोजेको हो। भेनेजुएलामा केही हदसम्म लागूपदार्थ तस्करी हुने गरे पनि, यो क्षेत्र अमेरिकाको दाबीअनुसार प्रमुख “ड्रग हब” भने होइन।
त्यसैले धेरैले यी आक्रमणहरूलाई राष्ट्रपति निकोलास मादुरोमाथि राजनीतिक दबाब सिर्जना गर्ने प्रयासका रूपमा देखेका छन्।
अमेरिकाले हालै मादुरोको पक्राउमा सहयोग पुऱ्याउने सूचना दिने जो-कसैलाई ५० मिलियन डलर इनाम घोषणा गरेको छ। मादुरोको निर्वाचनलाई अन्तर्राष्ट्रिय समुदायले अस्वीकार गरेको छ।