प्रकाशित मिति : श्रावण १२, २०८१ शनिबार
अब भारतीय एयरलाइन्स इन्डिगोको विमानमा महिलाहरू निकट भविश्यमा नै अपरिचित पुरुष यात्रुको छेउमा बस्न अस्वीकार गर्नसक्नेछन् । एक लोकप्रिय दक्षिण एसियाली एयरलाइन्स इन्डिगोले सुरु गरेको यो पहल अन्तरगत महिलाहरुले अनलाइन चेक इन प्रक्रियाको क्रममा विशेष सिट नक्सा हेर्न पाउनेछन् । जहाँ महिलाहरु बसेको सिटलाई गुलाबी रंगमा देखाइनेछ ।
भारतको देशको सबैभन्दा ठूलो सस्तो एयरलाइन्समा पुरुष यात्रुहरूले भने समान जानकारी पाउनेछैनन् । पुरुषहरुले सबै उपलब्ध सीटहरूमात्र हेर्न सक्नेछन्, जसरी सामान्य रूपमा देखाइन्छ । यो महिला मैत्री पहल महिला एकल यात्रुहरूलाई उनीहरूको उडानमा थप सहज महसुस गराउने प्रयासमा प्रस्ताव गरिएको कम्पनीले जनाएको छ ।
इण्डिगोले महिला यात्रुहरूका लागि यात्राको अनुभवलाई अझ सहज बनाउने लक्ष्य राखेको नयाँ सुविधाको घोषणा गर्न पाउँदा गर्व गर्ने बताएको छ । यो पहल बजार अनुसन्धानको आधारमा प्रस्तुत गरिएको एयरलाइन्सले जनाएको छ । अहिले यो कार्यक्रम परीक्षणका क्रममा रहेको जनाइएको छ ।
सबै यात्रुहरूलाई अनुपम यात्राको अनुभव प्रदान गर्न प्रतिबद्ध रहेको र यो नयाँ सुविधा सोही लक्ष्य हासिल गर्न चालेका धेरै कदमहरूमध्ये एउटा रहेको एयरलाइन्सको भनाई छ । यो सुविधा अर्को महिनामा सबै इन्डिगो उडानहरूमा उपलब्ध हुने जनाइएको छ ।
यो पहलबारे अनलाइन प्रतिक्रियाहरू मिश्रित देखिन्छन्। पुरुषहरूलाई पनि यो सुविधा दिनुपर्ने कतिपयको तर्क छ । किनभने कुनै पुरुष महिलाको छेउमा बस्न नचाहने पनि हुनसक्ने उनीहरुको तर्क छ । यो विषय अदालतमा पुग्नसक्ने समेत केहीले बताएका छन् ।
पुरुषहरूले उडानका क्रममा नराम्रो व्यवहार गर्ने विषय लामो समयदेखि चर्चाको विषय बनेको छ । एक महिलाले हालै सामाजिक सञ्जालमा पुरुष यात्रुको बारेमा गुनासो गर्दै ती यात्रुले आफ्नो सिटमा समेत हस्तक्षेप गरेर फैलिएको बताएकी थिइन् ।
