प्रकाशित मिति : असार २०, २०८२ शुक्रबार
फोटो : रासस
अमेरिकी राष्ट्रपति डोनाल्ड ट्रम्पले ऐतिहासिक ‘बिग व्युटिफुल बिल’ अर्थात नीति विधेयकमा हस्ताक्षर गरेका छन । यो विधेयकमा रक्षा खर्च र कर कटौतीमा जोड दिइएको छ ।
कङ्ग्रेसबाट झिनो बहुमतले पारित भएको आफ्नो नीति विधेयकमा शुक्रबार ह्वाइट हाउसमा उनले हस्ताक्षर गरेका हुन ।
स्वतन्त्रता दिवस मनाउने तयारीबीच आयोजित विधेयक हस्ताक्षर कार्यक्रममा ट्रम्पको मुख्य एजेन्डा समावेश गरिएको छ । जसमा कर कटौती, रक्षा खर्चमा वृद्धि र आप्रवासन कडाइ विधेयकका प्रमुख प्रावधान रहेका छन् ।
ट्रम्पले समर्थकहरूलाई सम्बोधन गर्दै विधेयकले आर्थिक वृद्धि उत्प्रेरित गर्ने दाबी गरेका छन । सन् २०१७ मा ट्रम्पको पहिलो कार्यकालमा लागू गरिएको कर कटौती विस्तार गरिने विधेयकमा उल्लेख गरिएको छ ।
कम आय भएका र अपांगता भएका मानिसहरूका लागि राज्यद्वारा सञ्चालित मेडिकेड कार्यक्रममा कटौती गरिएको छ । टिप्स, ओभरटाइम, र सामाजिक सुरक्षा आयमा कर छुट दिइएको छ ।
रक्षा क्षेत्रमा १५० बिलियन डलर बजेट वृद्धि हुनेछ । बाइडन प्रशासनको स्वच्छ ऊर्जा कर सुविधामा कटौती गरिएको छ । आप्रवासन र सीमा सुरक्षाका लागि १०० बिलियन डलरको बजेट आइसलाई दिइने विधेयकमा उल्लेख गरिएको छ ।
https://www.youtube.com/watch?v=videoseries
हस्ताक्षरको केही क्षणअघि बी २ बमवर्षक विमानको जोडी र लडाकु विमानहरूले हवाई प्रदर्शन गरेका थिए । यिनै बमवर्षकहरू हालै ईरानमा तीन आणविक स्थलमा आक्रमण गर्न प्रयोग गरिएको थियो ।
ह्वाइट हाउसको बालकनीबाट सम्बोधन गर्दै ट्रम्पले भने, “यो सबैभन्दा ठूलो खर्च कटौती हो, तर तपाईंले अनुभूति पनि गर्नुहुन्न। जनता खुसी छन्।”
उनले आप्रवासन नियन्त्रण र टिप्स तथा ओभरटाइम कर छुटलाई प्रमुख उपलब्धि भन्दै प्रशंसा गरे ।