प्रकाशित मिति : श्रावण ५, २०८२ सोमबार
बङ्गलादेशले आगामी पाँच वर्षसम्म हरेक वर्ष सात लाख टन उच्च गुणस्तरको गहुँ अमेरिकाबाट प्रतिस्पर्धी मूल्यमा आयात गर्ने सम्झौता गरेको छ।
जुलाईको अन्तिम साता बङ्गलादेश र अमेरिकाबीच हुने तेस्रो चरणको शुल्क वार्ताको पूर्वसन्ध्यामा यो सम्झौता सम्पन्न भएको हो। यसअघि दोस्रो चरणको वार्ता अमेरिकाले सुरक्षा सहयोगमा केही शर्तहरू राखेपछि निष्कर्षविहीन बनेको थियो।
यसैबीच, अमेरिकाले बङ्गलादेशसँग संयुक्त सैन्य अभ्यास जारी राख्ने घोषणा गरिसकेको छ।
गहुँ आयातसम्बन्धी सहमतिपत्रमा बङ्गलादेश सरकारका खाद्य विभागका महानिर्देशक मोहम्मद अबुल हसनत हुमायूँ कबीर र युएस गहुँ सङ्घका उपाध्यक्ष जोसेफ के। सोवरले बङ्गलादेशका खाद्य सल्लाहकार अली इमाम मजूमदारको उपस्थितिमा हस्ताक्षर गरेका थिए।
समारोहमा बोल्दै सल्लाहकार मजूमदारले यो सम्झौताले दुई देशबीच आपसी व्यापारिक सम्बन्ध विस्तार गर्ने मात्र होइन, थप अवसरहरू सिर्जना गरेर दुवै देशका जनतालाई लाभ पुर्याउने विश्वास व्यक्त गरे।
बङ्गलादेशको अन्तरिम सरकारले विज्ञप्तिमार्फत यो सम्झौता देशको खाद्य सुरक्षा, पोषण स्तर र आपूर्तिको स्थायित्व सुनिश्चित गर्ने उद्देश्यले गरिएको स्पष्ट पारेको छ।
यसबाहेक, जुलाई ९ को समयसीमाभन्दा दुई दिन अगाडि अमेरिकी राष्ट्रपति डोनाल्ड ट्रम्पले बङ्गलादेशमाथि ३५ प्रतिशत आयात कर लागु गरिने घोषणा गर्दै उक्त शुल्क अगस्ट १ देखि लागू हुने जानकारी दिएका थिए।