प्रकाशित मिति : फाल्गुन ४, २०८१ आईतबार
गायक तथा संगीतकार प्रेम सेन्चुरीले आफ्नो नयाँ गीत ‘माया सारिदेऊ’ सार्वजनिक गरेका छन्। नेपाली संगीतमा लामो समयदेखि योगदान दिँदै आएका सेन्चुरीको यो गीतले प्रेम र भावनाको गहिरो स्पर्श गरेको छ।
गीतमा प्रेम सेन्चुरी र सञ्जिता बरालको स्वर रहेको छ। डीपी खनालले लेखेको गीतमा राजु सिंहले संगीत भरेका छन् भने विमल बुढाथोकीले संगीत संयोजन गरेका छन्।
गीतको भिडियो https://youtu.be/fXyrwtd2MAU
माया सारिदेऊ’को भिडियोले प्रेमका विभिन्न पक्षलाई मन छुने गरी प्रस्तुत गरेको छ। भिडियोमा विक्की पुलामी र अस्मिता जुरेली मुख्य भूमिकामा छन्। समुद्री किनारको सुन्दर दृश्य, अस्ताउँदो सूर्यको सौन्दर्य र प्रेमी-प्रेमिकाबीचको भावनात्मक सम्बन्धलाई भिडियोमा आकर्षक रूपमा चित्रण गरिएको छ।
गोविन्द राईले निर्देशन र कोरियोग्राफी गरेको भिडियोलाई निशान घिमिरेले सम्पादन गरेका छन्। प्रेम सेन्चुरीको युट्युब च्यानलबाट सार्वजनिक गरिएको भिडियो ५ मिनेट ३२ सेकेण्डको छ। गीतको अडियो Amazon Music, iTunes Store, Apple Music, Spotify, TikTok लगायत अन्य डिजिटल माध्यममा पनि उपलब्ध छ।
प्रेम सेन्चुरीको सांगीतिक यात्रा
प्रेम सेन्चुरी नेपाली संगीत उद्योगका अनुभवी गायक हुन्। आफ्नो सांगीतिक यात्रामा उनले थुप्रै उत्कृष्ट गीत दिएका छन्, जसले उनलाई लोकप्रियताको शिखरमा पुर्याएको छ। उनका गीतहरूमा मौलिकता, भावना र गहिरो संगीत संयोजन पाइन्छ, जसले श्रोताको मन छुन्छ।
उनको पछिल्लो गीत ‘माया सारिदेऊ’ले प्रेमका विभिन्न आयामलाई उजागर गरेको छ। गीतमा समर्पण, चाहना र संवेदनशीलतालाई सुन्दर शब्द र संगीतको माध्यमबाट प्रस्तुत गरिएको छ।