प्रकाशित मिति : जेष्ठ १३, २०८२ सोमबार
अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनलाई ‘पूर्ण रूपमा पागल’ भनेपछि रुसले ट्रम्पमा भावनात्मक असन्तुलन देखिएको बताएको छ।
क्रेमलिनका प्रवक्ता दिमित्री पेस्कोभले ट्रम्पको टिप्पणीप्रति प्रतिक्रिया दिँदै उनी भावनात्मक असन्तुलनको प्रभावमा रहेको बताए। रुसको आरोप छ कि ट्रम्पले भावनात्मक असन्तुलनकै कारण यस्तो अभिव्यक्ति दिएका हुन्।
युक्रेनमाथि रुसको भीषण आक्रमण
रुसले युक्रेनमाथि हालसम्मकै सबैभन्दा ठूलो हवाई आक्रमण गरेपछि अमेरिकी राष्ट्रपति डोनाल्ड ट्रम्पको यो टिप्पणी आएको हो। उनले सामाजिक सञ्जालमा लेख्दै भनेका थिए, “उनमा केही भएको छ। उनी पूर्ण रूपमा पागल भएका छन्। अनावश्यक रूपमा धेरै मानिसहरू मारिरहेका छन्।”
यो टिप्पणी शनिबारदेखि आइतवार रातिसम्म रुसले युक्रेनमाथि ३६७ वटा ड्रोन र मिसाइल प्रहार गरी कम्तीमा १३ जनाको ज्यान लिएको घटनापछि आएको हो। युक्रेनी वायु सेनाका अनुसार यो रुसी आक्रमण हालसम्मकै सबैभन्दा ठूलो संयुक्त हवाई आक्रमण हो। पछिल्लो ड्रोन आक्रमणमा मात्र १० जनाको ज्यान गएको थियो।
जेलेन्स्कीको आरोप र जर्मनीको घोषणा
युक्रेनी राष्ट्रपति भ्लादिमिर जेलेन्स्कीले यी आक्रमणहरूलाई “सैन्य हिसाबले निरर्थक” भन्दै पुटिनले राजनीतिक उद्देश्यका लागि मानिसहरूको जीवन नष्ट गर्ने निर्णय लिएको आरोप लगाएका छन्।
यसैबीच, जर्मनीका चान्सलर फ्रेडरिक मर्जले युक्रेनलाई आपूर्ति गरिएका हतियारमाथि अब कुनै दायरा सीमितता नरहेको घोषणा गरे। उनले भने, “अब युक्रेनले रुसी सैन्य ठाउँहरूमा पनि आक्रमण गर्न सक्छ।” जर्मन सञ्चारमाध्यमका अनुसार, उनले अब युक्रेनलाई लामो दूरीको ‘टउरस मिसाइल’ दिने सम्भावना छ।
टउरस मिसाइलको दायरा करिब ५०० किलोमिटर रहेको छ। यसअघि बेलायत र अमेरिकाले युक्रेनलाई लम्बाइको सीमा हटाएर हतियार प्रयोग गर्न अनुमति दिइसकेका छन्। रुसले भने टउरस मिसाइलको आपूर्तिलाई “खतरनाक कार्य” भनेको छ।
ट्रम्पको जेलेन्स्कीप्रतिको आलोचना
ट्रम्पले राष्ट्रपति जेलेन्स्कीप्रति पनि आलोचना गर्दै भने, “उनको बोलीले समस्याहरू ल्याइरहेको छ, मलाई यो मन परेको छैन, र उसले यसलाई रोक्नुपर्छ।”
यद्यपि, युरोपेली देशहरू रुसमाथि थप प्रतिबन्धको तयारी गरिरहेका छन् भने अमेरिकाले वार्तामा प्रगति नभए शान्ति वार्ता प्रयास रोक्ने चेतावनी दिएको छ।