प्रकाशित मिति : जेष्ठ ३०, २०८१ बुधबार
पाल्पा र रुपन्देहीमा भएका दुर्घटनामा ३ जनाको मृत्यु भएको छ । अन्य ४५ जना घाइते भएका छन । बुटवलमाथिको पाल्पाको नुवाकोटबाट फर्किँदै गरेको कार दुर्घटनामा परी ३ जनाको मृत्यु भएको हो । २ जना घाइते भएका छन ।
दुर्घटनामा स्याङ्जा पुतलीबजार घर भई हाल बुटवल –१० बस्दै आएका कार चालक ५६ वर्षीय रामप्रसाद शर्मा भनिने छविलाल शर्मा , तिलोत्तमा–३ की ५७ वर्षीया आशा श्रेष्ठ र सोही ठाउँकी ५० वर्षीया भगवती श्रेष्ठको मृत्यु भएको इलाका प्रहरी कार्यालय बुटवलले जनाएको छ ।
दुर्घटनामा परी बुटवल उपमहानगरपालिका–९ बस्ने चन्द्रा श्रेष्ठ र बुटवल–११ बस्ने लक्ष्मीता श्रेष्ठ घाइते हुनु भएको प्रहरीले जनाएको हो । उहाँहरुको लुम्बिनी प्रादेशिक अस्पतालमा उपचार भैरहेको छ ।
नुवाकोट घुमेर फर्किँदै गरेको लु २ च ८५३१ नम्बरको कार बुधबार बेलुका करिब ९ बजेतिर दुर्घटनामा परेको हो । कार सडकदेखि १ सय मिटर तल खसेको इलाका प्रहरी कार्यालय बुटवलमा प्रमुख डीएसपी विजयराज पण्डितले बताउनु भयो ।
यस्तै रुपन्देहीको सालझण्डीमा बस दुर्घटना हुँदा ४३ जना घाइते भएका छन् ।
दाङबाट काठमाडौँका लागि छुटेको रा १ ख २७८३ नम्बरको बस रुपन्देहीको सैनामैना नगरपालिका–१० सालझन्डी बजारस्थित पुलमा बिग्रेर राखेको लु १ ख ६८७ नम्बरको बालुवा बोकेको ट्रकमा ठोक्किँदा दुर्घटना भएको जिल्ला प्रहरी कार्यालय रुपन्देहीले जनाएको छ ।
दुर्घटनामा बस चालक र यात्रुसहित ४३ जना घाइते भएको रुपन्देहीका प्रहरी प्रवक्ता डिएसपी मनोहर प्रसाद भट्टले जानकारी दिनुभयो ।
