परिवार, साथी वा नजिकका व्यक्तिलाई अमेरिकामा अध्यागमनले पक्रेमा के गर्ने ?

न्यूयोर्क सिटी मेयरको आप्रवासी मामिला कार्यालयले अपडेट गरिएको पुस्तिका सार्वजनिक गर्दै परिवार, साथी वा नजिकका व्यक्तिलाई अमेरिकामा अध्यागमनले पक्रेमा चाल्न सकिने कदमबारे मार्गनिर्देश प्रदान गरेको छ । यो पुस्तिकाले कुनै साथी वा परिवारका सदस्य पक्राउ परेमा के गर्ने भन्नेबारे चरणवद्ध मार्गदर्शन दिन्छ।

१. पक्राउ परेका व्यक्तिको स्थान पत्ता लगाउने

यदि कुनै साथी वा परिवारका सदस्य आईसीईद्वारा पक्राउ परेका छन् भने, आइस डिटेनी लोकेटर प्रयोग गरी उनीहरूको स्थान पत्ता लगाउन सकिन्छ। यसका लागि निम्न जानकारी आवश्यक पर्छ:

⬛ पक्राउ परेका व्यक्तिको जन्म देश र

⬛ उनीहरूको “एलियन नम्बर” (आठ वा नौ अङ्कको आईडी नम्बर, जुन आप्रवासन कागजात वा बन्दीलाई दिइएको नाडीको पट्टीमा भेट्न सकिन्छ) वा

⬛ तिनको पूरा नाम र जन्म मिति

सुझाव: नाम सही रूपमा उच्चारण गरिएको छ भनी सुनिश्चित गर्नुहोस्। यदि तपाईंलाई “एलियन नम्बर” थाहा छैन भने, पक्राउ परेका व्यक्तिसँग सम्पर्क गर्दा सोध्नुहोस्।

२. पक्राउ परेका व्यक्तिलाई भेट्न जाने प्रक्रिया

कागजात नभएका आप्रवासीहरू पनि पक्राउ परेका साथी वा परिवारका सदस्यलाई जोखिमबिना भेट्न जान सक्छन्। तर, प्रत्येक हिरासत केन्द्रको पहिचान प्रमाणीकरण, पृष्ठभूमि जाँच, र भेटघाट समयसम्बन्धी आफ्नै नीति हुन्छ।

⬛ हिरासत केन्द्रलाई सीधै फोन गरी जानकारी लिनुहोस्।

⬛ भेटघाट सूचीमा आफ्नो नाम समावेश छ भनी सुनिश्चित गर्नुहोस् र केन्द्रका नियमहरू पालना गर्नुहोस्।

⬛ थप जानकारीका लागि www.ice.gov/detention-facilities हेर्नुहोस्।

३. कानूनी प्रतिनिधित्वको पहुँच

अमेरिकी सरकारले निर्वासन प्रक्रियामा रहेका आप्रवासीहरूका लागि वकिल प्रदान गर्दैन। तर, न्युयोर्क इमिग्रेशन फेमिली युनिटी प्रोजेक्ट मार्फत केही बन्दीहरू निःशुल्क कानूनी सहायता पाउन सक्छन्, यदि:

⬛ मुद्दा न्युयोर्कको भेरिक स्ट्रीटमा रहेको अध्यागमन अदालतमा भएमा  (न्यू जर्सीको अदालतमा भएमा व्यक्ति न्युयोर्क सिटी निवासी हुनुपर्छ) ।

⬛ उनीहरूको सोही मुद्दाका लागि पहिलो अध्यागमन अदालत मिति भएमा ।

⬛ घरपरिवारको आय संघीय गरिबी निर्देशिकाको २००% भन्दा कम भएमा ।

जो न्युयोर्क इमिग्रेशन फेमिली युनिटी प्रोजेक्टको मापदण्डमा पर्दैनन्, तिनका लागि न्यूयोर्क सिटी मेयरको आप्रवासी मामिला कार्यालयको इमिग्रेशन कानुनी सहायता हटलाइन (१-८००-३५४-०३६५, सोमबार–शुक्रबार, बिहान ९ देखि साँझ ६) ले भाषा अनुवाद सेवासहित सहयोग पुर्‍याउँछ।

४. अदालत मिति र हिरासत अवधि

⬛ अदालत मिति:
पहिलो अदालत मिति र स्थान जान्न इमिग्रेशन कोर्ट इन्फर्मेशन लाइन (१-८००-८९८-७१८०) मा फोन गर्नुहोस् (स्वचालित सेवा, अंग्रेजी र स्पेनिश) वा https://acis.eoir.justice.gov/en/ मा हेर्नुहोस्।

⬛ हिरासत अवधि:
पक्राउ परेका व्यक्ति मुद्दाको टुंगो नलागेसम्म हिरासतमा रहन सक्छन्, वा न्यायाधीशले धरौटी अनुमति दिएमा बाहिर निस्कन सक्छन्। यदि धरौटी तोकिएको छ भने, आइसलाई तिर्नुपर्छ।

इन्भिजन फ्रिडम फण्ड, ब्ल्याक इमिग्रयान्टस बेल फण्ड, एजीबीटीक्यु फ्रिडम फण्ड जस्ता संस्थाहरूले धरौटी रकम जुटाउन आर्थिक सहायता प्रदान गर्न सक्छन्।

५. थप आवश्यक कदमहरू

⬛ पक्राउबारे विवरण संकलन गर्नुहोस्:
पक्राउ कसरी भयो भन्ने विस्तृत जानकारी लेख्नुहोस् र प्रमाण (फोटो, भिडियो आदि) संकलन गर्नुहोस्।

⬛ पक्राउको रिपोर्ट गर्नुहोस्:
इमिग्रेशन डिफेन्स प्रोजेक्ट हेल्पलाइन (२१२-७२५-६४२२) मा सम्पर्क गर्नुहोस्।

थप जानकारीका लागि

सबैभन्दा नयाँ अद्यावधिक जानकारी र स्रोतहरू www.nyc.gov/knowyourrights मा हेर्नुहोस्।

पुस्तिका डाउनलोड गर्न यहाँ क्लिक गर्नुहोस्।