प्रकाशित मिति : कार्तिक २०, २०८२ बिहीबार
मंगलबार न्यूयोर्कमा भएको चुनावमा निर्वाचित मेयर जोहरान ममदानी समर्थकहरूलाई हात हल्लाउँदै। (एपी फोटो/युकी इवामुरा)
अमेरिकी न्युयोर्क सिटीका मेयर निर्वाचित जोहरन माम्दानीले सबै महिला सदस्यहरू रहेको संक्रमण टिम घोषणा गरेका छन्।
न्युयोर्कको मेयर पद सम्हाल्ने तयारीका रूपमा उक्त टिमको घोषणा गरिएको हो। संक्रमण टिम पद हस्तान्तरण तयारी समिति वा नयाँ प्रशासन तयारी समूह हो। उनले आगामी जनवरी १ बाट औपचारिक रूपमा पद ग्रहण गर्नेछन्।
क्विन्समा आयोजित पत्रकार सम्मेलनमा ३४ वर्षीय डेमोक्रेटिक सोसलिस्ट नेताले सबै महिला सदस्यहरू रहेको संक्रमण टिम सार्वजनिक गरे।
कार्यकारी निर्देशकका रूपमा इलाना लियोपोल्ड र सह-अध्यक्षहरूमा मारिया टोरेस–स्प्रिङ्गर (पूर्व उप–मेयर), लिना खान (पूर्व फेडेरल ट्रेड कमिसन प्रमुख), ग्रेस बोनिला (युनाइटेड वेकी अध्यक्ष तथा सीईओ), र मेलानी हार्टजोग (पूर्व स्वास्थ्य तथा मानवीय सेवाका उप-मेयर) रहेका छन्।
लिना खानलाई समावेश गरिएको निर्णयले माम्दानीको प्रशासनले सुधारमुखी र साहसी व्यक्तिहरूलाई अघि बढाउने संकेत गरेको देखिन्छ।
एन्ड्र्यु कुमो र रिपब्लिकन उम्मेदवार कर्टिस स्लिवालाई हराएपछि पहिलो टेलिभिजन अन्तर्वार्तामा माम्दानीले पद ग्रहणको तयारीलाई महत्व दिए। उनले कार्यभार सम्हालेलगत्तै परिणाम दिन सुरु गरिने बताए।
उनको जितसँगै माम्दानी न्यूयोर्कका पहिलो मुस्लिम, पहिलो दक्षिण एसियाली मूलका, अफ्रिकामा जन्मिएका पहिलो व्यक्ति तथा एक शताब्दीभन्दा बढीमा सबैभन्दा कान्छा मेयर बन्नेछन्।
राष्ट्रपति डोनाल्ड ट्रम्पको विरोध गरेका कारण उनले आफ्नो कार्यकालमा ठूलो चुनौतीको सामना गर्नुपर्ने हुन सक्छ। ट्रम्पले माम्दानी मेयर बनेमा “संघीय कोष घटाउने” चेतावनी दिएका थिए। न्युयोर्कको २०२६ आर्थिक वर्षको बजेटमा संघीय स्रोतबाट ७.४ विलियन डलर (कुल खर्चको ६.४%) समावेश छ।
केही रिपब्लिकन सांसदहरूले उनलाई नागरिकता खोस्ने र निर्वासन गर्ने माग गरेका थिए। एन्ड्र्यु कुमोले समेत एक रेडियो कार्यक्रममा माम्दानीमाथि “९/११ जस्तो घटना भयो भने खुसी मनाउने” आरोप लगाउँदै हाँसेका थिए।
‘सेन्टर फर द स्टडी अफ अर्गनाइज्ड हेट’को अध्ययनअनुसार सेप्टेम्बरदेखि अक्टोबरसम्म माम्दानीविरुद्धका इस्लामोफोबिक पोस्टहरू ४५० प्रतिशत बढेका थिए।
माम्दानीले राजनीतिक विचार फरक भए पनि सबै न्युयोर्कवासीलाई एकजुट हुन आग्रह गरेका छन्।
माम्दानीको जितसँगै देशभर डेमोक्र्याटहरूले ऐतिहासिक सफलता हात पारेका छन्। न्यु जर्सीमा मिकी सेरिल र भर्जिनियामा एबिगेल स्प्यानबर्गर गभर्नर निर्वाचित भएका छन्।
क्यालिफोर्नियामा गाभिन न्युजमको प्रस्ताव पारित भएको छ। यसले पाँच रिपब्लिकन क्षेत्रहरूलाई डेमोक्र्याटहरूको पक्षमा पुन:चित्रण गर्ने बाटो खुला गरेको छ।
न्युयोर्कको नयाँ प्रशासनले केही दिनभित्रै उप-मेयरहरू र विभागीय आयुक्तहरूको नाम घोषणा गर्ने बताएको छ।