प्रकाशित मिति : चैत्र २०, २०८१ बुधबार
अमेरिकाको मेरिल्यान्ड नेप्लिज ब्याडमिन्टन क्लबले नेपाली नयाँ वर्ष २०८२ को अवसर पारेर पहिलो पटक ब्याडमिन्टन प्रतियोगिता आयोजना गर्ने घोषणा गरेको छ। उक्त प्रतियोगिता यहीँ अप्रिल १२ मा क्यापिटल ब्याडमिन्टन एकेडेमी, कोलम्बिया, मेरिल्यान्डमा हुनेछ । प्रतियोगिता बिहान ८ बजेदेखि साँझ ५ बजेसम्म हुनेछ ।
क्लबका सल्लाहकार मिलन बुढाथोकीका अनुसार प्रतियोगिताले नेपाली मूलका खेलाडीहरूलाई एकसाथ ल्याई खेलकुदको माध्यमबाट मित्रता, खेल भावना र सांस्कृतिक ऐक्यबद्धता अभिवृद्धि गर्ने लक्ष्य राखेको छ। प्रतियोगिता पुरुष ओपन डबल्स विधामा हुनेछ, जसमा नेपाली मूलका खेलाडीहरूले मात्र प्रतिस्पर्धा गर्नेछन्।
प्रतियोगिताका विजेता र उपविजेताले नगद पुरस्कार र ट्रफी प्राप्त गर्नेछन् । प्रथम पुरस्कार दुई हजार डलर र ट्रफी राखिएको छ भने उपविजेताले एक हजार डलर प्रदान गरिनेछ। यो पुरस्कार बाल्टिमोर बिजनेस ब्रोकरेजले प्रायोजन गरेको हो।
प्रतियोगितामा सहभागी हुन चाहने नेपाली मूलका खेलाडीहरूले अहिले नै दर्ता गर्न सक्ने क्लबका अध्यक्ष कुल बहादुर रोकाले बताए।
प्रतियोगिताले रोमाञ्चक प्रतिस्पर्धा, समुदायको संलग्नता र नेपाली नयाँ वर्षको उत्साह बोकेको क्लबका सदस्य दामोदर पौडेल बताउँछन् । अमेरिकामा रहेका सम्पूर्ण नेपाली मूलका ब्याडमिन्टन खेलाडीहरूलाई सहभागिताका लागि आह्वान गरिएको उनले बताए ।