प्रकाशित मिति : असार २२, २०८२ आईतबार
तेल निर्यातकर्ता देशहरुले तेलको अन्तर्राष्ट्रिय आपूर्ति बढाउने रणनीति तय गरेको देखिएको छ ।
पेट्रोलियम निर्यातकर्ता राष्ट्रहरूको संगठन (ओपेक) र यसका साझेदारहरू मिलेर बनेको समूह ‘ओपेक प्लस’ ले आगामी अगस्ट महिनादेखि दैनिक ५ लाख ४८ हजार ब्यारेल कच्चा तेल उत्पादन बढाउने निर्णय गरेको हो ।
यो वृद्धिदर जुलाई महिनाको तुलनामा बढी हो । ओपेकको पेट्रोलियम निर्यातकर्ता राष्ट्रहरूको संगठन हो । यो एक अन्तर्राष्ट्रिय संगठन हो । जसको स्थापना सन् १९६० सेप्टेम्बर १४ मा इराकको बगदादमा गरिएको थियो ।
हाल यसको मुख्यालय अस्ट्रियाको भियना शहरमा छ । ओपेकको मुख्य उद्देश्य सदस्य राष्ट्रहरूबीच सहकार्य गर्दै विश्व बजारमा कच्चा तेल (पेट्रोलियम) को मूल्य स्थिर राख्नु, तेलको आपूर्तिमा सन्तुलन कायम गर्नु र सदस्य राष्ट्रहरूको आर्थिक हितको रक्षा गर्नु हो ।
ओपेकले विश्व बजारको मागअनुसार उत्पादनको मात्रा घटाउने वा बढाउने नीति अपनाएर अन्तर्राष्ट्रिय तेल मूल्यमा सन्तुलन ल्याउने प्रयास गर्दछ ।
जुलाई महिनामा ओपेक प्लसले दैनिक ४ लाख ११ हजार ब्यारेलले उत्पादन बढाएको थियो । समूहले उत्पादनमा गरिएको कटौतीलाई बिस्तारै हटाउने योजनाअनुसार यो निर्णय लिएको हो ।
https://www.youtube.com/watch?v=videoseries
बैठकमा साउदी अरेबिया, रसिया, इराक, संयुक्त अरब इमिरात, कुवेत, कजाकिस्तान, अल्जेरिया र ओमान लगायतका सदस्य राष्ट्रहरूले विश्व बजारको अवस्था र भविष्यको अनुमानबारे छलफल गरेका थिए ।
ओपेकको वेबसाइटमा जारी वक्तव्यअनुसार, हालको विश्व अर्थतन्त्र स्थिर देखिएको र तेलको भण्डारण (स्टक) न्यून भएकोले बजार अवस्था बलियो देखिएको छ ।
जसको आधारमा उत्पादन वृद्धिको निर्णय गरिएको हो। तर वक्तव्यमा यदि बजारमा अप्रत्याशित परिवर्तन आएमा, यो वृद्धि रोकिने वा उल्टो रूपमा फेरिन पनि सक्ने भनिएको छ ।