प्रकाशित मिति : भाद्र ४, २०८१ मंगलबार
मङ्किपक्स ’एमपक्स’ भाइरस कोभिड–१९ को नयाँ भेरियन्ट नभएको विश्व स्वास्थ्य सङ्गठनले बताएको छ ।
एमपक्स ‘क्लेड १ बी’ भेरियन्टको थप अनुसन्धान आवश्यक रहेको बताउदै संयुक्त राष्ट्र सङ्घले यसलाई अन्तर्राष्ट्रिय चिन्ताको सार्वजनिक स्वास्थ्य आपतकाल घोषणा गरेको हो ।
एमपक्स प्रकोपलाई नियन्त्रण गर्न सकिने डब्ल्यूएचओका युरोपेली निर्देशक हान्स क्लुगेले बताउनु भयो ।
सन् २०२२ जुलाईमा, डब्ल्यूएचओले एमपक्सको कम गम्भीर भेरियन्ट ’क्लेड २बी’ लाई पनि अन्तर्राष्ट्रिय स्वास्थ्य आपतकाल घोषणा गरेको थियो ।
युरोपेली क्षेत्रमा यसको सङ्क्रमणलाई पूर्ण रूपमा उन्मूलन गर्न आवश्यक अनुसन्धान भइरहेको विश्व स्वास्थ्य संगठनले बताएको हो ।
क्लुगेले व्यक्तिबीच छालाको सम्पर्क एमपक्स सङ्क्रमण फैलिने मुख्य कारक रहेको बताउनुभयो । सङ्क्रमण फैलिने अन्य कारण अझै अलि अस्पष्ट छन् । यस विषयमा थप अनुसन्धान आवश्यक छ ।
डब्लुएचओले मास्क प्रयोग गर्न सिफारिस नगरेको बताएको छ । अहिले विश्वव्यापी खोप अभियान सिफारिस पनि नगरेको संगठनले बताएको हो ।
तर सबैभन्दा बढी जोखिममा रहेका समूहलाई भने खोप प्रयोग गर्न स्वास्थ्य संगठनले सिफारिस गरेको छ ।
