प्रकाशित मिति : फाल्गुन ३, २०८१ शनिबार
युक्रेन युद्धका बिषयमा छलफल गर्न युरोपेली संघमा आवद्ध देशहरुले आकस्मिक बैठक आयोजना गर्ने भएका छन । यो बैठक फ्रान्सको राजधानी पेरिसमा आयोजना हुने बताइएको छ ।
युक्रेन युद्धको बिषयमा हुने अमेरिका र रुसबीचको शान्ती वार्तामा युरोपलाई बाहिर राखिन सकिने संभावना देखिएकाले यसबारेमा छलफल गर्न युरोपेली देशका नेताहरुले आकस्मिक छलफलका आवश्कता महशुष गरेको देखिएको छ । अर्को हप्ता यो छलफलको आयोजना गरिएको छ ।
बेलायती प्रधानमन्त्री केयर स्टार्मर पेरिस जाने अपेक्षा गरिएको छ । युक्रेन युद्धका विषयमा हुने सहमतिमा युक्रेनको सहभागिता अनिवार्य रहेको उनले बताइरहेका छन ।
अमेरिकी राष्ट्रपति डोनाल्ड ट्रम्पका विशेष दूत केथ केलीगले युरोपेली नेताहरूसँग परामर्श गरिनेछ तर कुनै पनि शान्ति वार्तामा तिनीहरूलाई सहभागी गराइने छैन भनेर अभिव्यक्ति दिएका थिए ।
ह्वाइट हाउसका वरिष्ठ अधिकारीहरू साउदी अरबमा रुस र युक्रेनी वार्ताकारसँग भेट्ने बताएका छन ।
बेलायती प्रधानमन्त्री केयरले अमेरिकी र युरोपलाई एकताबद्ध बनाइ शान्तिका लागि साझा दृष्टिकोण सुनिश्चित गर्नको भूमिका निर्वाह गर्नसक्ने अपेक्षा गरिएको छ ।
प्रधानमन्त्रीले युरोपेली नेताहरूका विचारहरूका बिषयमा ट्रम्पसँग आगामी महिनाको अन्त्यमा ह्वाइट हाउसमा छलफल गर्नेछन् ।
आकस्मिक बैठकपछि युरोपेली नेताहरू र युक्रेनी राष्ट्रपति भोलोडिमिर जेलेन्स्कीबीचको थप बैठक आयोजना हुनेसक्ने अपेक्षा गरिएको छ ।
युक्रेनी राष्ट्रपति जेलेन्स्कीले शनिबार म्युनिक सुरक्षा सम्मेलनमा युरोपको सेना बनाउन माग गरेका थिए । जेलेन्स्कीले अमेरिका र युरोप बीचको पुरानो सम्बन्ध अन्त्य भएको पनि दावी गरेका छन ।