प्रकाशित मिति : फाल्गुन ११, २०८१ आईतबार
अमेरिकामा ट्रम्प प्रशासनले अमेरिकी अन्तर्राष्ट्रिय विकास नियोग (यूएसएआइडी)का करिव २ हजार कर्मचारीलाई बर्खास्त गरेको छ । आइतबार मध्यराति देखि लागू हुने गरि १ हजार ६ सय यूएसएआइडीका कर्मचारीहरुलाई बर्खास्त गरिएको हो ।
करिव ४ हजार २ सय कर्मचारीहरुलाई प्रशासनिक बिदामा बस्न निर्देशन दिइएको छ । प्रशासनिक बिदामा बस्न लगाइएका कर्मचारीहरुलाई पुन रोजगारीको अवसर दिइने छ या स्थायी रुपमै उनीहरुको पद खारेज गरिने छ भनेर बताइएको छैन ।
हजारौं यूएसएआइडीका कर्मचारीलाई हटाउने राष्ट्रपति डोनाल्ड ट्रम्पको योजना अनुसार नै यो निर्णय भएको हो ।
एक संघीय न्यायाधीशले अस्थायी रुपमा यूएसएआइडीका कर्मचारीहरूलाई घटाउने योजनामा रोक लगाएको भएता पनि उक्त रोक स्थायी नहुने बताएका कारण प्रशासनले यो निर्णय गरेको हो ।
सन १९६१ मा स्थापना भएको यूएसएआइडी ले हालसम्म १० हजार कर्मचारीलाई रोजगार दिइरहेको थियो ।
आईतबारका दिन यूएसएआइडीका कर्मचारीहरूलाई पठाइएको सूचनामा प्रशासनिक कार्यकारी कार्यालयले महत्वपूर्ण कार्यहरूमा संलग्न वा नेतृत्वमा रहेका कर्मचारीहरुलाई प्रशासनिक बिदाबाट मुक्त गरिने उल्लेख छ ।
कति कर्मचारीहरू यूएसएआइडीमा राखिनेछन् बताइएको छैन । तर यूएसएआइडी ले पहिले ६११ जना कर्मचारीलाई आवश्यक मान्दै उनीहरूलाई विशेष मान्यता दिएको थियो ।
सूचनामा यूएसएआइडी ले विदेशमा कार्यरत कर्मचारीहरूको स्वदेश फिर्तीको खर्च बहन गर्ने योजना रहेको पनि उल्लेख गरिएको छ ।
कम्तीमा ५ हजार ८ सय कर्मचारी प्रशासनिक बिदामा वा बर्खास्त हुनसक्ने देखिएको छ ।
गत शुक्रबार वाशिंगटन डिसी का न्यायाधीश कार्ल निकोल्स द्वारा गरिएको निर्णयपछि पछिल्लो घटनाक्रम विकसित भएको हो ।
न्यायाधीशको निर्णयमा ट्रम्प प्रशासनलाई यूएसएआइडीका कर्मचारीहरूलाई हटाउने योजनामा अघि बढ्न अनुमति दिइएको छ ।
ट्रम्प प्रशासनले संघीय श्रमिक बललाई घटाउने र लागत कटौती गर्ने योजना बनाएको छ । जसको नेतृत्व एलन मस्कले गरिरहेका छन ।