प्रकाशित मिति : चैत्र ६, २०८१ बुधबार
युक्रेनी राष्ट्रपति भोलोडिमिर जेलेन्स्कीले अमेरिकी राष्ट्रपति डोनाल्ड ट्रम्पसँग भएको टेलिफोन वार्ताबारे प्रतिक्रिया दिएका छन्। उनले उक्त वार्ता “सकारात्मक”, “स्पष्ट” र “धेरै महत्त्वपूर्ण” भएको बताएका छन्।
उनले युक्रेन र संयुक्त राज्य अमेरिका मिलेर युद्धको वास्तविक अन्त्य र स्थायी शान्ति प्राप्त गर्नका लागि सहकार्य जारी राख्नुपर्ने सहमति भएको समेत बताए । जेलेन्स्कीले भने, “हामीले युक्रेन र संयुक्त राज्य अमेरिका मिलेर युद्धको वास्तविक अन्त्य र स्थायी शान्ति प्राप्त गर्नका लागि सहकार्य जारी राख्नुपर्ने सहमति गरेका छौँ।”
उनले अमेरिकासँगको साझेदारीलाई महत्त्वपूर्ण ठहर्याउँदै अमेरिका, राष्ट्रपति ट्रम्प र अमेरिकी नेतृत्वसँग मिलेर यस वर्ष स्थायी शान्ति हासिल गर्न सकिने विश्वास समेत व्यक्त गरे । उनले थपे, “हामी विश्वास गर्छौँ, अमेरिका, राष्ट्रपति ट्रम्प र अमेरिकी नेतृत्वको साथमा यस वर्ष स्थायी शान्ति हासिल गर्न सकिन्छ।”
बुधबार अमेरिकी राष्ट्रपति ट्रम्प र युक्रेनी राष्ट्रपति जेलेन्स्कीबीच एक घण्टासम्म टेलिफोन वार्ता भएको छ । यसअघि, अमेरिकी राष्ट्रपति ट्रम्पले युक्रेनी राष्ट्रपति जेलेन्स्कीसँग राम्रो टेलिफोन वार्ता सम्पन्न गरेको बताएका थिए । उनले उक्त वार्तामा रुस र युक्रेनका आवश्यकताहरूलाई मिलाउनका लागि छलफल गरिएको बताउँदै आफूहरू सही दिशामा अघि बढिरहेको जिकिर गरेका थिए ।
राष्ट्रपति ट्रम्पले लेखेका छन्, “युक्रेनी राष्ट्रपति जेलेन्स्कीसँग राम्रो टेलिफोन वार्ता सम्पन्न गरेँ। हिजो राष्ट्रपति पुटिनसँग भएको वार्तालाई आधार मान्दै रुस र युक्रेनका आवश्यकताहरूलाई मिलाउनका लागि छलफल गरियो। हामी सही दिशामा अघि बढिरहेका छौँ।”
यो पनि पढ्नुहोस् :