प्रकाशित मिति : आश्विन ३०, २०८२ शुक्रबार
फोटो : रासस
अमेरिकाले लामो दुरीमा मार हान्न सक्ने टमहक क्रुज मिसाइल युक्रेनलाई दिने सहमति हुन नसकेको राष्ट्रपति भोलोडिमिर जेलेन्स्कीले बताएका छन्।
अमेरिकी राष्ट्रपति डोनाल्ड ट्रम्पसँगको भेटपछि युक्रेनी राष्ट्रपति भोलोडिमिर जेलेन्स्कीले अमेरिकाबाट टमहक मिसाइलको आपूर्तिका विषयमा कुनै ठोस प्रतिबद्धता नपाएको बताएका हुन्।
व्हाइट हाउसमा भएको सौहार्दपूर्ण द्विपक्षीय वार्तापछि जेलेन्स्कीले भने, “हामीले लामो दूरीका मिसाइलबारे कुरा गर्यौं, तर यस विषयमा सार्वजनिक रूपमा केही नबोल्ने निर्णय गर्यौं, किनभने अमेरिका स्थिति थप नचर्कियोस् भन्ने चाहन्छ।” भेटपछि ट्रम्पले सामाजिक सञ्जालमा लेख्दै युक्रेन र रुसलाई “जहाँ छौ त्यहीं रोक” र युद्ध अन्त्य गर भन्दै आग्रह गरे।
यो भेट राष्ट्रपति ट्रम्पले रुसी राष्ट्रपति भ्लादिमिर पुटिनसँग टेलिफोनमा कुरा गरेको भोलिपल्ट भएको हो। उनले चाँडै हंगेरीमा पुटिनसँग भेट गर्ने योजना पनि बताएका छन्।
युक्रेनले टमहक मिसाइल पायो भने, त्यसले रुसी तेल र ऊर्जा पूर्वाधारहरूमा आक्रमण गरेर पुटिनको युद्ध अर्थतन्त्रलाई गम्भीर रूपमा कमजोर पार्न सक्ने जेलेन्स्कीको दाबी छ।
ट्रम्पले मिसाइल पठाउनु “स्थिति बढाउने कदम” हुने बताए, तर थप छलफल हुने संकेत पनि दिएका छन्। ट्रम्पले भने, “टमहकको धम्की राम्रो हो, तर त्यो धम्की सधैं रहन्छ।” जेलेन्स्कीले ट्रम्पसँगको वार्तामा युक्रेनले ड्रोन सटहीस्वरूपमा दिने प्रस्ताव राखेका थिए। जसले ट्रम्पलाई मुस्कान र सहमतिको संकेत दिलायो।
जेलेन्स्कीले ट्रम्पलाई मध्यपूर्वमा पहिलो चरणको शान्ति सम्झौता सुनिश्चित गरेकोमा बधाई दिँदै भने, “त्यो सफलताको लहरलाई युक्रेनमा शान्ति ल्याउन प्रयोग गर्न सकिन्छ।”
जेलेन्स्कीले टमहकको सम्भावनाले रूस डराएको छ, किनभने त्यो शक्तिशाली हतियार हो भनेका छन्। एक्समा लेख्दै जेलेन्स्कीले भने, “हामीले युरोपेली नेताहरूसँग कुरा गरेका छौं।
अहिलेको मुख्य प्राथमिकता बढी जीवन बचाउनु, युक्रेनको सुरक्षा सुनिश्चित गर्नु र सम्पूर्ण युरोपलाई बलियो बनाउनु हो।” हालैका दिनहरूमा ट्रम्पले टमहक बेच्ने सम्भावनाप्रति खुलापन देखाएका थिए। तर पुटिनले यस्तो कदमले अमेरिकासँगको सम्बन्धलाई थप तनावपूर्ण बनाउन सक्छ भनेर चेतावनी दिएका छन्।