प्रकाशित मिति : असार ३०, २०८१ आईतबार
एफबीआईले अमेरिकी राष्ट्रपति उम्मेदबार तथा पूर्व राष्ट्रपति डोनाल्ड ट्रम्पमाथि गोली चलाउने व्यक्तिको पहिचान गरेको छ । बन्दुकधारी २० बर्षीय थोमस म्याथ्यू क्रुक्स रहेको एफबीआईले जनाएको छ । पेन्सिलभेनियाको बेथेल पार्क निवासी क्रुक्सका बारेमा अधिकारीहरूले थप जानकारी जारी गरेका छैनन् । सेक्रेट सर्भिसको सुरक्षा कारवाहीमा आक्रमणकारीको मृत्यु भएको थियो ।
संदिग्ध आक्रमणकारीको शव ट्रम्पले बोलिरहेको स्टेजको लगभग ४०० फिट उत्तरमा रहेको एउटा सानो भवनको छतमा अचल अवस्थामा रहेको भिडियोहरु सार्वजनिक भएका छन् । शवको पोजिशन सम्भावित फायरिङ पोजिशनसँग मेल खान्छ। ट्रम्पको दाहिने कानमा देखिएको चोट पनि त्यही दिशाबाट चलेको गोलीसँग मिल्दोजुल्दो देखिएको छ ।
शनिबार साँझ पेन्सिलभेनियामा चुनावी र्यालीमा ट्रम्पमाथि गोली प्रहार भएको थियो । ट्रम्पको हत्या प्रयास असफल भएपनि उनको दाहिने कानको माथिल्लो भागमा चोट लागेको थियो । ट्रम्पलाई पेन्सिलभेनियाको बटलरमा गोली प्रहार भएपछि उनलाई तत्काल अस्पताल लगिएको थियो । घटनामा र्यालीमा सहभागी अर्का एकजना व्यक्तिको पनि मृत्यु भएको छ । अन्य दुई सहभागीहरु गम्भीर घाइते भएको सेक्रेट सर्भिसले जनाएको छ ।
घटनालाई हत्याको प्रयासका रूपमा अनुसन्धान भइरहेको अधिकारीहरूले बताएका छन्। ट्रम्पलाई उनको कानको वरिपरि रगत बगिरहेको अवस्थामा स्टेजबाट बाहिर निकालिएको थियो । ट्रम्पले सामाजिक सञ्जालमार्फत आफ्नो दाहिने कानको माथिल्लो भागमा गोलीले छेडेको बताएका छन् ।
आक्रमणको अमेरिका र विश्वभरबाट निन्दा भइरहेको छ । राष्ट्रपति जो बाइडेनले हिंसाको निन्दा गर्दै छोटो टेलिभिजन वक्तव्य दिएका थिए । बाइडेनले शनिबार साँझ छोटो टेलिभिजन टिप्पणीमा ट्रम्पलाई तुरुन्तै बाहिर निकालिएकोमा सुरक्षा अधिकारीप्रति कृतज्ञता व्यक्त गरे । यस्तो प्रकारको हिंसाको लागि अमेरिकामा कुनै ठाउँ नभएको उनले बताए ।
बाइडेनको चुनावी अभियानले शनिबार राति एक विज्ञप्तिमा सबै चुनावी विज्ञापनहरु स्थगित गर्ने बताएको थियो । टेलिभिजन विज्ञापनहरू सकेसम्म चाँडो स्थगनका लागि काम गरिरहेको जनाएको थियो । यो कदमले राष्ट्रपति पदका उम्मेदवारमाथि हुने सम्भावित हत्या प्रयासको संकट निस्किँदा राजनीतिभन्दा माथि उठ्ने प्रयासलाई झल्काएको छ ।
सेक्रेट सर्भिसका प्रवक्ता एन्थोनी गुग्लिएल्मीले संदिग्ध बन्दुधकारीले मञ्च तर्फ धेरैपटक गोली चलाएको बताएका छन् । ट्रम्पले समर्थकहरूलाई सीमा पार गर्ने कागजपत्रविहिनको संख्याको चार्ट देखाउँदै गर्दा उनीमाथि गोली चलेको थियो ।
कोलाहल सुरु भएपछि उनी हतारिएर निस्किएका थिए । उनलाई सेक्रेट सर्भिसका एजेन्टहरूले मञ्चबाट एस्कर्ट गरेका थिए। उनको अनुहार र दाहिने कान रगतले लतपतिएको थियो। बाहिर निस्कदै गर्दा ट्रम्पले भीडतिर आफ्नो मुट्ठी उठाएका थिए ।
कभर तस्वीरमा रिपब्लिकन राष्ट्रपति पदका उम्मेदवार पूर्व राष्ट्रपति डोनाल्ड ट्रम्पमाथि गोली प्रहारपछि जवाफी फायर गर्दै स्नाइपरहरू । (एपी फोटो / जीन जे पुस्कर)
