ट्याक्स सिजन चलिरहँदा आईआरएसद्वारा ६ हजार कर्मचारी निष्काशन सुरु

अमेरिकामा ट्याक्स सिजन चलिरहँदा आईआरएसद्वारा ६ हजार कर्मचारी निष्काशन सुरु गरिएको छ । राष्ट्रपति ट्रम्पले एलन मस्कको नेतृत्वमा रहेको सरकारी दक्षता विभागमार्फत सुरु गरेको संघीय कर्मचारीको व्यापक शुद्धीकरणको भागका रुपमा आईआरएसका नयाँ कर्मचारीहरुलाई निकाल्न थालिएको हो ।

आईआरएसका कर्मचारीहरूलाई बिहीबार जागिर कटौतीको बारेमा सूचित गरिएको थियो। प्रभावित अधिकांश कर्मचारीहरु नयाँ कामदारहरू हुन् । कर सिजनको बिचमा भएको यो कटौतीले करदाताहरूलाई प्रश्नहरूको जवाफ पाउन र सरकारले तिर्नु पर्ने सबै पैसा उठाउन गाह्रो बनाउने अपेक्षा गरिएको छ।

विहिबार डेनभरमा रहेको आईआरएसको कार्यालयका दर्जनौं कर्मचारीहरूलाई निकालिएको थियो । डेनभरमा १५० जनासम्म आईआरएस कर्मचारीहरू निकाल्ने तयारी गरिएको जनाइएको छ ।
केही कर्मचारीहरूलाई बिहीबार बिहान सबेरै कामबाट हटाइएको थियो । कामबाट हटाइएको इमेलमा उनीहरूलाई कार्यालय छाड्न ३० मिनेटको समय दिइएको जनाइएको छ ।

आईआरएसका कर्मचारीहरूलाई बिहीबार पठाइएको एक मेमोमा एजेन्सीमा ती कर्मचारीको निरन्तर रोजगारी सार्वजनिक हितमा नभएको उल्लेख गर्दै इमेलमा कर्मचारीहरूलाई बिहीबार आफ्नो पदबाट हटाउने बताइएको थियो ।