टेक्सासलाई नयाँ संसदीय नक्सा प्रयोग गर्न सर्वोच्च अदालतद्वारा अनुमति

अमेरिकी सर्वोच्च अदालतले टेक्सासलाई नयाँ संसदीय निर्वाचनको नक्सा प्रयोग गर्न अनुमति दिएको छ।

सर्वोच्च अदालतको पछिल्लो अनुमतिसँगै २०२६ को मध्यावधि चुनावमा रिपब्लिकन पार्टीले आफ्नो बहुमत बलियो बनाउने अवसर पाएको छ।

टेक्सासले गत महिनामा दिएको आपत्कालीन अनुरोधपछि अदालतले यो अनुमति दिएको हो।

टेक्सासले तल्लो अदालतको निर्णय रोकिनुपर्ने माग गरेको थियो। तल्लो अदालतले नयाँ नक्सालाई रोक लगाएको थियो।

यो नक्सालाई राज्य संसदले पारित गरी रिपब्लिकन गभर्नर ग्रेग एबटले अगस्टमा हस्ताक्षर गरेका थिए।

६-३ को बहुमतले सर्वोच्च अदालतले आफ्नो “प्रारम्भिक मूल्याङ्कन” मा टेक्सासले आपत्कालीन राहतका आवश्यक मापदण्ड पूरा गरेको फैसला गरेको हो।

नोभेम्बरमा टेक्सासको तल्लो अदालतले प्रस्तुत प्रमाणहरूले नयाँ जिल्ला सीमाहरू “जातीय विभाजनका लागि बनाइएका” देखिएको भन्दै पुरानो नक्सा प्रयोग गर्न आदेश दिएको थियो।

टेक्सासका डेमोक्रेट सांसदहरू नयाँ नक्सामा मतदान रोक्नका लागि राज्य बाहिर गएका थिए। यस घटनाले अन्य राज्यहरूमा पनि नयाँ नक्सा परिवर्तन गर्ने दौड सुरु गराइदियो।

क्यालिफोर्नियाले टेक्सासको फाइदा सन्तुलन गर्न नयाँ नक्सा प्रस्ताव गर्यो, जुन नोभेम्बरको विशेष चुनावमा मतदाताले अनुमोदन पनि गरिसकेका छन्। अमेरिकाको न्याय मन्त्रालयले टेक्सासको पुन:चित्रण योजनाविरुद्ध मुद्दा दायर गरिरहेको छ।

टेक्सासका डेमोक्रेट सांसद जिन वूले सर्वोच्च अदालतले टेक्सासका मतदाताहरू र अमेरिकी लोकतन्त्रलाई असफल बनाएको बताए।