प्रकाशित मिति : पुस १७, २०८२ शुक्रबार
अमेरिकाको टेक्सासमा क्रिसमसदेखि हराइरहेकी एक १९ वर्षीया युवती मृत अवस्थामा फेला परेकी छन्।
सान एन्टोनियो नजिकैबाट बेपत्ता भएकी क्यामिला मेन्डोजा ओल्मोस आफ्नै घर नजिकै मृत फेला परेको अधिकारीहरूले पुष्टि गरेका छन्।
बेक्सार काउन्टी शेरिफको कार्यालयका अनुसार, उनको मृत्युको कारणबारे विस्तृत अनुसन्धान भइरहेको छ।
क्यामिला बेपत्ता भएपछि स्थानीय समुदायका सदस्यहरू नक्सा र ड्रोनसहित खोजी कार्यमा जुटेका थिए। दर्जनौँ स्वयंसेवकहरूले बिदाको समयभर उनलाई खोज्न साथ दिएका थिए। परिवारले यो बिदाको मौसम सुखद रूपमा अन्त्य हुने र छोरी सुरक्षित घर फर्कने आशामा प्रार्थना गरिरहेका थिए। तर, छोरीको मृत्युको खबरले परिवार यतिबेला विक्षिप्त बनेको छ।
बेक्सार काउन्टी शेरिफ जाभियर सालाजारका अनुसार, उनी हराएदेखि नै कुनै गम्भीर खतरामा पर्न सक्ने आशङ्का गरिएको थियो। अधिकारीहरूले अनुसन्धानमा सहयोग पुग्ने कुनै पनि भिडियो वा जानकारी साझा गर्न स्थानीय बासिन्दालाई आग्रह गरेका छन्। क्यामिलालाई अन्तिम पटक क्रिसमस इभको बिहान ७ बजे छिमेकीको निगरानी क्यामेरा मा देखिएको थियो।
क्यामिलाको मृत्युको ठोस कारण नखुले पनि सामान्यतया युवावर्गमा हुने असामयिक मृत्युका पछाडि सडक दुर्घटना, खेलकुद वा अन्य आकस्मिक घटनाहरू, गहिरो मानसिक तनाव, डिप्रेसन वा चिन्ताका कारण निम्तिने गम्भीर परिणाम मृत्युका कारण हुन सक्छन् ।
समुदाय वा विद्यालय स्तरमा हुने बन्दुकसम्बन्धी हिंसा,क्यान्सर, मुटु रोग वा अन्य अचानक देखिने गम्भीर स्वास्थ्य जटिलता,लागूऔषध वा नशालु पदार्थको अत्यधिक प्रयोग मृत्युका कारण हुन सक्ने विभिन्न तथ्यहरुले बताउँछन ।