टेक्ससमा ५ जना स्कुल कर्मचारीलाई आइस ले गर्‍यो पक्राउ

आइस अधिकारी । फाइल तस्वीर । स्रोत : अमेरिकी इमिग्रेशन एण्ड कस्टम्स इन्फोर्समेन्ट

अमेरिकाको टेक्सास राज्यको अस्टिन स्कुल जिल्लामा कार्यरत पाँच जना कर्मचारीहरूलाई अमेरिकी आव्रजन तथा सीमाशुल्क प्रवर्तन (आइस) ले पक्राउ गरेको छ।

कम्तीमा पाँच जना अस्टिन स्कुल जिल्लाका कर्मचारीहरूलाई आइस ले पक्राउ गरेपछि सहकर्मी र प्रशासकहरूबीच चिन्ता फैलिएको छ। पक्राउ परेकाहरू कहाँ छन् र कस्तो अवस्थामा छन् भन्नेबारे कसैलाई जानकारी नदिइएको शिक्षाकर्मीहरूले बताएका छन्।

अस्टिन स्कुल अमेरिकाको टेक्सास राज्यको अस्टिन सहरमा अवस्थित एक ठूलो सरकारी विद्यालय प्रणाली हो। यो क्षेत्रमा बसोबास गर्ने विद्यार्थीहरूलाई केजीदेखि १२ कक्षासम्म निःशुल्क सार्वजनिक शिक्षा प्रदान गर्ने मुख्य निकाय यही हो।

अस्टिन स्कुल टेक्सासका सबैभन्दा महत्त्वपूर्ण शिक्षा केन्द्रहरूमध्ये एक हो। यसले सामाजिक–आर्थिक रूपमा विविध परिवारका बालबालिकालाई शैक्षिक अवसर प्रदान गर्छ। विद्यालयहरूले समुदाय, परिवार तथा विद्यार्थीहरूका बीच घनिष्ठ सम्बन्ध बनाइराख्न सक्रिय भूमिका खेल्दछन्।

शिक्षक तथा कर्मचारीहरूको सबैभन्दा ठूलो युनियनले पक्राउ परेकाहरूमध्ये एक शिक्षक, एक बस चालक र लन्चरूमका कर्मचारीहरू रहेको पुष्टि गरेको छ।

पक्राउ परेकामध्ये दुई कर्मचारी अदालतको मिति (सुनुवाइ) भेट्न जाँदा र अर्को मेक्सिकोमा भएको अन्त्येष्टिमा गएर फर्कने क्रममा पक्राउ परेका हुन्। आइस ले उनीहरूको अवस्थाबारे कुनै अद्यावधिक जानकारी (अपडेट) नदिएको बताइएको छ।

जिल्लाको नीतिअनुसार उनीहरूलाई अहिले पनि तलब दिइँदैछ, तर लामो समयको हिरासतका कारण यो नीति परिवर्तन गर्नुपर्ने देखिएको छ। नयाँ नीति यो वर्षभित्रै बोर्डमा प्रस्तुत गरिने अपेक्षा छ।

जिल्लाले प्रशासकहरूलाई अस्थायी रूपमा दीर्घकालीन ‘सब्स्टिच्युट’ (कामचलाउ कर्मचारी) को व्यवस्थापन गर्न निर्देशन दिएको छ। यदि नयाँ कर्मचारी राखिए पनि, पुराना कर्मचारीहरू रिहा भएमा उनीहरूको पद सुरक्षित रहनेछ।

केही अभिभावकले गिरफ्तारीको खबर पाएर सञ्चार माध्यमहरूसँग आफ्नो चिन्ता व्यक्त गरेका थिए।