जाली ग्रीन कार्ड भेटिएपछि अमेरिका-क्यानाडा सीमाबाट आमा-छोरा पक्राउ

फोटो: केन लुन्ड/ CC BY-SA 2.0 अन्तर्गत इजाजतपत्र प्राप्त

अमेरिकी आप्रवासन अधिकारीहरूले ७ वर्षीय विद्यार्थी र उनकी आमालाई अमेरिका–क्यानाडा सीमाबाट पक्राउ गरेका छन्। महिलासँग जाली ग्रीन कार्ड भएको पत्ता लागेपछि उनीहरूलाई नियन्त्रणमा लिइएको सीबीपीले जानकारी दिएको छ ।

सीबीपीका अनुसार ती महिला, उनका छोरा र एक वयस्क पुरुष साथी क्यानडा जान खोज्दा क्यानडाका अधिकारीहरुले प्रवेश नदिई अमेरिकातिरै फर्काएका थिए । हाईगेट स्प्रिंग्स पोर्ट अफ इन्ट्रीमा महिलासँग जाली ग्रीन कार्ड र सोसल सेक्युरिटी कार्ड फेला परेका थिए ।

सीबीपीका अनुसार आमालाई अमेरिकी इमिग्रेशन एन्ड कस्टम्स इन्फोर्समेन्ट (आइस) को इन्फोर्समेन्ट एण्ड रिमुभल अपरेशन्समा स्थानान्तरण गरिएको थियो । उनका छोरा पनि आमासँगै छन् । वयस्क पुरुष साथीलाई पनि थप अनुसन्धान र प्रक्रियाको लागि आइस इआरओमा सुम्पिएको सीबीपीले जनाएको छ ।

छोरा विनोस्कीको जेएफके इलिमेन्टरी विद्यालयमा अध्ययनरत थिए । उनी थ्यांकसगिभिङ बिदापछि कक्षामा फर्किएनन्। स्कूल अधिकारीहरूले उनका पितासँग सम्पर्क गर्दा बिहीबारदेखि आमा र छोरासँग सम्पर्क नभएको जानकारी पाए।

विनोस्की स्कूल डिस्ट्रिक्टका सुप्रिन्टेन्डेन्ट विल्मर चाभारियाले भने, “विद्यार्थीको सुरक्षा र भलाइ हाम्रो मुख्य चासो हो। यस कठिन समयमा हामी बालक र परिवारलाई सहयोग गर्न केन्द्रित छौं।”

हाल, आमा र छोरा टेक्सासको इमिग्रेशन प्रोसेसिंग सेन्टरमा राखिएका छन् भने उनीहरुलाई अध्यागमन अदालतमा पेश गरिदैछ । विनोस्की समुदायले बालकका पितालाई कानुनी प्रतिनिधित्व सुरक्षित गर्न र आमासँग सम्पर्क कायम राख्न सहयोग गर्दै आएको छ। स्कूल डिस्ट्रिक्टले पनि परिवारलाई सहयोग गर्न निजी आपतकालीन कोषबाट एक हजार डलर प्रदान गरेको छ।

चाभारियाले भने, “हामी विद्यार्थीकी आमासँग सम्पर्कमा छौं ताकि उनी र उनका बच्चा परिस्थिति अनुसार सकेसम्म राम्रो अवस्थामा रहुन्। परिवारको मुद्दा जनवरी महिनाको सुरुमा सुनुवाइको लागि तय भएको छ। त्यसअघि उनीहरू टेक्सासको हिरासतमा रहनेछन्।”