प्रकाशित मिति : चैत्र ४, २०८१ सोमबार
अमेरिकी विदेश मन्त्रालयले विगतमा जारी भएका भिसाको पनि छानविन गरिने चेतावनी दिएको छ । विदेश मन्त्रालयले भिसा धारकहरूलाई कडा चेतावनी जारी गर्दै भिसा स्क्रिनिङ प्रक्रिया भिसा प्राप्त भएपछि पनि निरन्तर चलिरहने बताएको हो ।
आज सामाजिक सञ्जालमा पोस्ट गरिएको एक सन्देशमा मन्त्रालयले अमेरिकी सरकारले भिसा धारकहरूलाई निरन्तर निगरानीमा राखेर सबै अमेरिकी कानुन र आप्रवासन नियमहरूको पालना सुनिश्चित गर्ने बताएको छ।
“अमेरिकी भिसा स्क्रिनिङ भिसा जारी भएपछि रोकिँदैन। हामी भिसा धारकहरूले सबै अमेरिकी कानुन र आप्रवासन नियमहरू पालना गरेनगरेको निरन्तर जाँच गर्छौं – र यदि उनीहरूले पालना गरेनन् भने हामी उनीहरूको भिसा रद्द गर्छौं र देश निकाला गर्छौं”, मन्त्रालयले उल्लेख गरेको छ।
यो घोषणा ट्रम्प प्रशासनले आप्रवासन कानुनको कडाइका साथ कार्यान्वयन जारी राखिरहेको बेला आएको हो, जसले अमेरिकी नियमहरू उल्लङ्घन गर्ने व्यक्तिहरूले भिसा रद्द र देश निकालाजस्ता गम्भीर परिणामहरू भोग्नुपर्ने संकेत गरेको छ।
हालैका दिनहरूमा आप्रवासन नीतिमा व्यापक परिवर्तनको हिस्साकारूपमा भिसा रद्द हुने घटनाहरू बढेका छन्। कोलम्बिया विश्वविद्यालयकी भारतीय छात्रा रञ्जनी श्रीनिवासनको विद्यार्थी भिसा अमेरिकी विदेश मन्त्रालयले मार्च ५, २०२५ मा रद्द गरेको थियो। उनले आतंकवादी संगठनको रूपमा तोकिएको हमासलाई समर्थन गरेको आरोप लगाउँदै यो कदम चालिएको थियो।
डिपार्टमेन्ट अफ होमल्याण्ड सेक्युरिटीका अनुशार श्रीनिवासनले मार्च ११, २०२५ मा सीबीपी होम एप प्रयोग गरी देश छोडेकी थिइन्। उनी अमेरिकाबाट क्यानडा गएको जनाइएको छ ।