प्रकाशित मिति : कार्तिक २७, २०८१ मंगलबार
गण्डकी प्रदेशका पूर्वमन्त्री दीपक मनाङे पक्राउ पर्नुभएको छ । ज्यानमार्ने उद्योगमा दोषी ठहर भएका मनाङेलाई प्रहरीले मंगलबार बिहान काठमाडौंको सानो भर्याङबाट पक्राउ गरेको हो ।
पक्राउ परेका मनाङेलाई फैसला कार्यान्वयनका लागि अदालत उपस्थित गराइने प्रहरीले बताएको छ ।
कम्फर्ट हाउजिङमा लुकेर बसेको अवस्थामा मनाङेलाई पक्राउ गरिएको केन्द्रीय अनुसन्धान ब्युरो (सीआईबी)का प्रबक्ता होविन्द्र बोगटीले जानकारी दिनुभएको छ ।
गण्डकी प्रदेशसभा सदस्य दीपक मनाङेलाई सर्वोच्च अदालतले कात्तिक २० गते ज्यान मार्ने उद्योगमा दोषी ठहर गरेको थियो । दीपक मनाङेको समूहले २०६१ सालमा अर्का डन चक्रे मिलन भनिने मिलन गुरुङलाई तरबार हानेको आरोप थियो ।
तत्कालीन पुनरावेदन अदालत पाटनले सोही मुद्धामा ५ वर्ष कैद सजाय सुनाएपछि मनाङे पक्राउ पर्नुभएको थियो । तर, १० वर्ष भन्दा कम जेल सजाय भएको मुद्दामा जेलबाहिर रहेर पुर्पक्ष गर्न पाइने कानुनी व्यवस्था अनुसार उहाँ रिहा हुनुभएको थियो ।
मनाङले मनाङबाट दुई कार्यकाल गण्डकी प्रदेशसभा सदस्य को रुपमा प्रतिनिधित्व गर्नुभएको छ । उहाँ गण्डकी प्रदेशको पटकपटक मन्त्री पनि बनिसक्नु भएकोे छ ।
