प्रकाशित मिति : भाद्र १२, २०८१ बुधबार
आफ्नाबारेमा आलोचनात्मक लेख लेखेका कारण पत्रकारलाई उनकै घर बाहिर छुरा प्रहार गरी हत्या गरेको घटनामा एकजना पूर्व सरकारी अधिकारी दोषी ठहर भएका छन् । सन् २०२२ मा भएका उक्त असामान्य हत्याले प्रेस स्वतन्त्रताको बारेमा डर पैदा गरेको थियो। लस भेगास काउन्टीका एक पूर्व अधिकारीलाई बुधवार पत्रकारको हत्या गरेकोमा दोषी ठहर गरिएको हो ।
सन् २०२२ को सेप्टेम्बरमा पत्रकार जेफ जर्मनलाई आफ्नै घर बाहिर छुरा प्रहार गरी हत्या गरिएको थियो। प्रहरी अनुसन्धानकर्ताहरु र क्लार्क काउन्टी जूरीले हत्यारा रोबर्ट टेल्स रहेको निष्कर्ष निकालेको छ । रोबर्ट टेल्स उत्तराधिकारी नभएका मृतकको सम्पत्ति ह्यान्डल गर्ने काउन्टी कार्यालयमा कार्यरत थिए ।
आफ्नो हत्याको केही महिना अघि पत्रकार जर्मनले द लस भेगास रिभ्यु जर्नलको लागि एउटा लेख लेखेका थिए जसमा कर्मचारीहरूको गुनासोहरू वर्णन गर्दै टेल्सले कार्यस्थलमा खराब वातावरण सिर्जना गरेको, पक्षपात प्रदर्शन गरेको र कर्मचारी सदस्यसँग अनुचित सम्बन्ध राखेको उल्लेख गरिएको थियो । टेल्सले ती आरोपहरू अस्वीकार गरेका थिए । लेख बाहिर आएको एक महिना पछि उनले अर्को कार्यकालका लागि चुनाव हारेका थिए । जर्मनले भने यसबारे लगातार रिपोर्टिङ गरिरहे।
अभियोजकहरूका अनुशार टेल्स सेप्टेम्बरको तातो दिनमा पत्रकार जर्मनको घरमा गएर घरको छेउमा रहेका झाडीहरूमा लुकेका थिए । उनले जर्मनलाई पर्खिएर आउनासाथ छुरा प्रहार गरेका थिए । टेल्सलाई पहिलो डिग्रीमा हत्यामा दोषी ठहराइएको छ । उनलाई २० वर्षपछि परोलको सम्भावनासहित आजीवन कारावासको सजाय सुनाइएको छ ।
अभियोजन पक्षले पत्रकार जर्मनको हातमा भेटिएको डीएनए टेल्सको हातसँग मेल खाएको ठहर गरेको थियो । पुलिसले आक्रमणकारीको सुरक्षा फुटेज बरामद गरेको थियो, जसमा टेल्सको घरमा भएका मिल्दो वस्तुहरू फेला पारेको थियो। भिडियो फुटेजले हत्याको दिन पत्रकार जर्मनको घर र टेल्सको छिमेकको बीचमा यात्रा गरिरहेको कार देखाएको थियो ।
कमिटी टु प्रोटेक्ट जर्नालिस्ट्सले सन् १९९२ देखि अमेरिकामा आफ्नो कामको सिलसिलामा १५ जना सञ्चारकर्मी मारिएको जनाएको छ । जसमा सन् २०१८ मा अन्नापोलिसमा मारिएका पाँच जनालाई पनि समावेश गरिएको छ। पत्रकार जर्मन आफ्नो जन्मस्थान विस्कन्सिनबाट लस भेगासमा सरेका थिए किनभने उनी संगठित अपराधलाई कभर गर्न चाहन्थे । उनले चार दशकभन्दा बढी समयसम्म मोबस्टरहरू, निर्वाचित अधिकारीहरू र क्यासिनो टाइटनहरूको छानबिन गरेका थिए ।
