प्रकाशित मिति : चैत्र १, २०८१ शनिबार
अमेरिकी आप्रवासन प्राधिकरणले कोलम्बिया विश्वविद्यालयमा गत वर्षको प्यालेस्टिनीहरुको समर्थन गर्दै विरोध प्रदर्शनमा सहभागी दोस्रो कार्यकर्तालाई गिरफ्तार गरिएको घोषणा गरेको छ ।
पश्चिमी किनाराका प्यालेस्टिनी लेखा कर्डियालाई न्यु जर्सीमा पक्राउ गरिएको अमेरिकी गृहमन्त्री मन्त्रालयले जानकारी दिएको छ ।
अर्को विद्यार्थी भारतीय रञ्जानी श्रीनिवासन भने यसै हप्ताको सुरूवातमा स्वेच्छाले स्वदेश फर्किने निर्णय गरेको मन्त्रालयले बताएको छ ।
यो घटनाले कोलम्बिया विश्वविद्यालयका कार्यकर्ता महमुद खलीलको गिरफ्तारीपछि आएको हो । उनलाई शनिबार न्यूयोर्कमा पक्राउ गरिएको थियो । पक्राउ परेका उनलाई लुइजियाना स्थित जेलमा पठाइएको छ ।
डीएचएसका अनुसार कर्डियाको विद्यार्थी भिसा २०२२ मा उपस्थितिको कमी भएको कारण देखाउदै रद्द गरिएको थियो । उनले कोलम्बियामा अध्ययन गर्दै थिइन् कि अरु कुनै संस्थामा भन्ने कुरा उल्लेख नगरिएको देखिन्छ ।
उनलाई अप्रिल २०२४ मा कोलम्बिया विश्वविद्यालयमा प्रदर्शनमा भाग लिँदा गिरफ्तार गरिएको थियो । रञ्जानी श्रीनिवासन कोलम्बिया विश्वविद्यालयमा शहरी योजना विभागकी पीएचडी विद्यार्थी थिइन् । उनको भिसा ५ मार्चमा रद्द गरिएको छ ।
गृह सुरक्षा मन्त्री क्रिस्टि नोएमले अमेरिकामा अध्ययन र बसोबास गर्ने भिसा प्राप्त गर्नु विशेषाधिकार भएको बताएका छन । तर हिंसा र आतंकवादको पक्षमा वकालत गरेमा त्यो विशेषाधिकार रद्द हुने र अमेरिकामा बस्न नपाइने मन्त्री नोएमले बताए ।
ट्रम्प प्रशासनले कोलम्बिया विश्वविद्यालयबाट ४०० मिलियन डलरको संघीय अनुदान फिर्ता लिएको छ ।
विश्वविद्यालयमा रहेका यहुदी विद्यार्थीहरुमाथि दुरव्यवहार हुँदा विश्वविद्यालयले नजरअन्दाज गरेको र प्यालेस्टिनी समर्थकलाई सघाएको आरोप ट्रम्प प्रशासनले लगाएको छ ।