प्रकाशित मिति : जेष्ठ १८, २०८२ शनिबार
अमेरिकी राष्ट्रपति डोनाल्ड ट्रम्पको कार्यकारी आदेशपछि डिपार्टमेन्ट अफ होमल्याण्ड सेक्युरिटी डीएचएसले संघीय आप्रवासन कानुनको पालना नगर्ने कागजपत्र बिहिनलाई संरक्षण प्रदान गर्ने स्याङ्क्चुअरी क्षेत्रहरूको विस्तृत सूची सार्वजनिक गरेको छ। यस सूचीमा सहर, काउन्टी र राज्यहरू समावेश छन्, जसले जानीजानी संघीय अध्यागमन कानुनको कार्यान्वयनमा बाधा पुर्याएर अमेरिकी नागरिकहरूलाई जोखिममा पारेको डीएचएसको भनाइ छ। डीएचएसका अनुसार, यो सूचीमा ५०० भन्दा बढी क्षेत्रहरू रहेका छन्, जसमा न्युयोर्क राज्य र यसका दर्जनौं काउन्टी तथा न्युयोर्क सहर पनि प्रमुख रूपमा परेका छन्।
डीएचएसका अनुसार यी सहरहरूले खतरनाक आपराधिक गैरकानूनी आप्रवासीहरूलाई कारबाहीबाट जोगाउँछन् र कानुन कार्यान्वयन गर्ने अधिकारीहरूलाई गम्भीर खतरामा पार्छन्। यो कदम राष्ट्रपति ट्रम्पले अप्रिल २८, २०२५ मा हस्ताक्षर गरेको कार्यकारी आदेशको पालना गर्दै चालिएको हो। उक्त आदेशमा डीएचएसका सचिव क्रिस्टी नोएम र महान्यायाधिवक्ता पाम बन्डीलाई संघीय आप्रवासन अधिकारीहरूसँग सहयोग गर्न अस्वीकार गर्ने क्षेत्रहरूलाई पहिचान गरी सार्वजनिक गर्न निर्देशन दिइएको थियो।
न्युयोर्क राज्य र यसका अल्बानी, डचिज, मोनरो, ओरेन्ज, पुटनम, रकल्यान्ड, साराटोगा, सफोक, सुलिभान, टम्प्किन्स, अल्स्टर, वारेन, वेन, वेष्टचेस्टर र येट्स जस्ता दर्जनौं काउन्टीहरू साथै न्युयोर्क सहरसमेत यस सूचीमा परेका छन्। यी क्षेत्रहरूले अवैध आप्रवासीहरूलाई संरक्षण दिँदै संघीय कानुनको अवज्ञा गरिरहेको डीएचएसको दाबी छ। डीएचएसले यी कानुनविहीन क्षेत्रहरूलाई सार्वजनिक रूपमा उजागर गर्न र कानुनको शासनको सम्मान नगरेकोमा जवाफदेही बनाउन प्रतिबद्ध रहेको बताएको छ।
“यी राजनीतिज्ञहरूले खतरनाक आपराधिक गैरकानूनी आप्रवासीहरूलाई संरक्षण गर्न अमेरिकी नागरिक र हाम्रा कानुन कार्यान्वयन गर्ने अधिकारीहरूलाई जोखिममा पारिरहेका छन्,” डीएचएस सचिव क्रिस्टी नोएमले बताएकी छन् । हामी यी राजनीतिज्ञहरूलाई उजागर गर्दैछौं जसले आपराधिक गैरकानूनी आप्रवासीहरूलाई आश्रय दिन्छन् र संघीय कानुनको अवज्ञा गर्छन्। राष्ट्रपति ट्रम्प र म सधैं अमेरिकी जनताको सुरक्षालाई पहिलो प्राथमिकता दिनेछौं। राजनीतिज्ञहरूलाई सूचित गरिन्छ: संघीय कानुनको पालना गर्नुहोस्।” उनले बताइन।
न्युयोर्क राज्य, न्युयोर्क सहर र यसका विभिन्न काउन्टीहरू लगायत सूचीमा परेका प्रत्येक क्षेत्रलाई उनीहरूको गैर–अनुपालन र संघीय फौजदारी कानुनका सबै सम्भावित उल्लङ्घनबारे औपचारिक सूचना पठाइनेछ। डीएचएसले यी क्षेत्रहरूलाई तत्काल आफ्ना नीतिहरू समीक्षा गरी संघीय आप्रवासन कानुनसँग मेल खाने गरी संशोधन गर्न र अमेरिकी नागरिकहरूको सुरक्षा गर्ने आफ्नो दायित्व नवीकरण गर्न माग गरेको छ। यसले न्युयोर्कमा आप्रवासन नीतिमा ठूलो प्रभाव पार्ने निश्चित छ।