प्रकाशित मिति : श्रावण ६, २०८१ आईतबार
अमेरिकाको ओहायोको रेनोल्ड्सबर्गमा नेपाली भाषी दम्पत्तिहरु घरमै मृत अवस्थामा भेटिएपछि प्रहरीले घरेलु हिंशाको आशंकामा अनुसन्धान अगाडि बढाएको छ । हत्यापछि आत्महत्याका रुपमा बयान गरिएको यो घटनामा के कारणले मृत्यु भयो भन्नेबारे प्रहरीले सार्वजनिक रूपमा अझै खुलाएको छैन ।
रोबिन्स लुप ड्राइभको ८६०० ब्लकमा रहेको घरमा ५० वर्षीय सदा धिमाल र ४० वर्षीय टिका धिमाल बुधबार विहान मृत फेला परेका थिए । दम्पतीको घरको आँगनमा सदा धिमालले आत्महत्या गरेको देखेपछि छिमेकीले प्रहरीलाई खबर गरेका थिए । उनलाई वेस्ट लिकिङ फायर डिपार्टमेन्टका मेडिक्सहरुले बिहान ८ बजेर ४३ मिनेटमा मृत घोषणा गरेका थिए।
प्रहरीले घरमा खोजी गर्दा माथिल्लो तलाको शयनकक्षमा टिका धिमालको शव फेला पारेका थिए । उनको टाउकोमा चोट लागेको थियो । अनुसन्धानकर्ताहरूले घटनास्थलबाट रगतले लतपतिएको एउटा ठूलो चक्कु र स्कार्फ बरामद गरेका थिए । प्रहरीले सदा धिमालका दुईवटा गाडीमा पनि तलासी गरेको जनाईएको छ ।
प्रहरीले बिहीबार दम्पतीको नाम पुष्टि गरेको मृत्युको आधिकारिक कारणमा उनीहरूको शव परीक्षण पूरा नभएसम्म सार्वजनिक नहुने भएको छ । उनीहरुको अन्त्येष्टी शनिबार रेनोल्ड्सबर्गमा गरिएको छ ।
घरमा १६, १४ र ८ वर्षका तीन छोराछोरीहरु पनि थिए । उनीहरु भने सुरक्षित अवस्थामा नै फेला परेका थिए । बच्चाहरूलाई आश्रयका लागि लिकिङ काउन्टी चिल्ड्रेन सर्भिसलाई सम्पर्क गरिएको थियो।
पछिल्लो समयमा ओहायोको नेपाली भाषी समुदायमा हत्या र आत्महत्याका घटनामा उल्लेख्य बृद्धि भएको छ । हालै अमेरिकाको ओहायोमा श्रीमति चन्द्रमाया पौडेल रिमालको हत्याको अभियोगमा ग्रान्ड जूरीले दोषी ठहर गरेका नेपाली भाषी जेम्स रिमालले जेलमै आत्महत्या गरेको बताइएको थियो ।
गत महिना नै ओहायोको समिट काउन्टीमा बस्दै आएका उद्धव कुमार विश्वले आफैले आफैलाई गोली हानेका थिए । लगत्तै उनलाई मृत घोषणा गरिएको थियो । उनी एक्रोनको योर्क स्ट्रीटमा बस्दै आएका थिए । घरको बेसमेन्टमा उनले आफैलाई गोली हानेका थिए । ३९ बर्षीय उद्धव कुमार भुटानी शरणार्थीका रुपमा अमेरिका आएका थिए ।