प्रकाशित मिति : भाद्र ३, २०८२ बुधबार
राष्ट्रपति डोनाल्ड ट्रम्पको प्रशासनले ३७ जना वर्तमान तथा पूर्व अमेरिकी अधिकारीहरूको सुरक्षा क्लियरेन्स खारेज गरेको छ। उनीहरूलाई “राजनीतिक स्वार्थ वा व्यक्तिगत लाभका लागि गोप्य सूचनाको दुरुपयोग गरेको” आरोप लगाइएको छ।
सामाजिक सञ्जालमा सार्वजनिक गरिएको एउटा मेमोमार्फत राष्ट्रिय गुप्तचर निर्देशक टुल्सी ग्याबार्डले विभिन्न राष्ट्रिय सुरक्षा एजेन्सीका प्रमुखहरूलाई तत्काल उनीहरूको क्लियरेन्स हटाउन निर्देशन दिएकी हुन्। उनले यो कदम राष्ट्रपति ट्रम्पकै आदेशमा गरिएको बताएकी छन्।
यी अधिकारीहरूमा जो बाइडेन र बराक ओबामा नेतृत्वका प्रशासनमा काम गरेका पूर्व राष्ट्रिय सुरक्षा सल्लाहकार र सहायकहरू पनि परेका छन्। तर, मेमोमा प्रस्तुत गरिएको आरोपको कुनै प्रमाण भने सार्वजनिक गरिएको छैन।
सुरक्षा क्लियरेन्सले अधिकारीहरूलाई संवेदनशील सरकारी सूचनामा पहुँच दिन्छ। कतिपय पूर्वअधिकारीहरूले आफ्ना उत्तराधिकारीलाई सल्लाह दिन वा निजी क्षेत्रका रक्षा तथा एयरोस्पेस उद्योगका रोजगारीका लागि पनि क्लियरेन्स कायम राख्ने गरेका हुन्छन्।
हाल सूचीकृत सबै ३७ जनासँग सक्रिय क्लियरेन्स अझै थियो वा थिएन भन्ने स्पष्ट छैन। ग्याबार्डका अनुसार, ट्रम्पले यी क्लियरेन्सहरू हटाउन आदेश दिनुको कारण “सूचना दुरुपयोग, अनधिकृत रूपमा गोप्य सूचना चुहावट, गम्भीर पेसागत मापदण्डको उल्लङ्घन, र सार्वजनिक विश्वासमा धोका पुर्याउने कार्य” थियो।
“सुरक्षा क्लियरेन्स पाउनु अधिकार होइन, विशेषाधिकार हो,” ग्याबार्डले एक्स (पहिलेको ट्विटर) मा लेखिन्, “संविधानप्रति शपथ खाएर आफूलाई अमेरिकी जनताको हितभन्दा माथि राख्नेहरूले पवित्र विश्वास तोडेका छन्।”
यद्यपि, मेमोमा कुनै विशिष्ट अधिकारीमाथि प्रत्यक्ष अभियोग भने लगाइएको छैन।
ट्रम्प प्रशासनले यसअघि पनि बाइडेन, उपराष्ट्रपति कमला ह्यारिस, र क्यापिटोल दङ्गासम्बन्धी जाँचमा संलग्न पूर्व सांसदहरूबाट पनि सुरक्षा क्लियरेन्स खोसिसकेको छ।
हालका हप्ताहरूमा ग्याबार्डले विशेषगरी ओबामा युगका गुप्तचर अधिकारीहरूलाई निशाना बनाइरहेकी छन्। उनीहरूमाथि रूसले २०१६ को चुनावमा हस्तक्षेप गरेको निष्कर्ष निकालेको आरोप लगाइएको छ। ट्रम्प र ग्याबार्डले त्यो निष्कर्षलाई “राष्ट्रविरोधी षड्यन्त्र” भनेर वर्णन गरेका छन्।
डेमोक्र्याटहरूले भने यस कदमलाई “राजनीतिक नौटङ्की” भन्दै अस्वीकार गरेका छन्। उनीहरूले यसलाई ट्रम्प प्रशासनका अलोकप्रिय नीतिबाट ध्यान हटाउने प्रयास र ट्रम्पको जेफ्री एप्स्टिनसँगको विवादित सम्बन्ध ढाकछोप गर्ने चाल भनेका छन्।
राष्ट्रिय गुप्तचर निर्देशकको कार्यालयबाट ४० प्रतिशत कर्मचारी घटाइनेछ र वार्षिक बजेटबाट करिब ७० करोड डलर कटौती गरिने बताइएको छ।