प्रकाशित मिति : जेष्ठ १६, २०८२ बिहीबार
टेस्लाका सीईओ एलन मस्कले ट्रम्प प्रशासनमा आफ्नो सल्लाहकार भूमिकाबाट बाहिरिने निर्णय गरेसँगै टेस्लाको सेयर बिहीबार २ प्रतिशत भन्दा बढीले उकालो लागेको छ । टेक अर्बपतिले जुनमा बहुप्रतीक्षित रोबोट्याक्सी डेब्यू अघि इलेक्ट्रिक वाहन कम्पनीमा आफ्नो ध्यान केन्द्रित गर्ने समाचारले लगानीकर्ताहरूमा आशा जगाएको छ ।
मस्कको अमेरिकी राष्ट्रपति डोनाल्ड ट्रम्पसँगको संलग्नता र युरोपमा दक्षिणपन्थी नीतिहरूप्रति उनको मुखर समर्थनले टेस्लाविरुद्ध विरोधहरू भड्काएको थियो, जसले केही ग्राहकहरूलाई टाढा धकेल्यो र सेयरहोल्डरहरूमा ब्रान्ड क्षतिको चिन्ता बढाएको थियो । टेस्ला सन् २०२४ मा ऐतिहासिक गिरावटपछि लगातार दोस्रो वर्ष बिक्री घट्ने बाटोमा छ, जसले स्पेसएक्स र एक्सका मालिकसमेत रहेका मस्कमाथि कम्पनीलाई पुनस् वृद्धिको बाटोमा ल्याउन दबाब बढाएको छ।
मार्चमा भएको सेयरहोल्डर बैठकमा, मस्कले सरकारको दक्षता विभागमा आफ्नो भूमिका घटाउने संकेत गरेका थिए । उनले भनेका थिए, “म हप्तामा एक वा दुई दिन मात्र समय दिनेछु।” गत हप्ता उनले आफ्नो राजनीतिक खर्चमा ठूलो कटौती गर्ने प्रतिबद्धता पनि जनाए । गत वर्ष ट्रम्पको अभियान र अन्य रिपब्लिकन प्रयासहरूमा करिब ३०० मिलियन डलर खर्च गरेका थिए।
“यो टेस्ला सेयरहोल्डरहरूको लागि संगीत जस्तै हो,” वेडबश सेक्युरिटीजका विश्लेषक ड्यान इभ्सले भने, जो लामो समयदेखि टेस्लाका समर्थक हुन्। उनले थपे, “२०२५ मस्क र टेस्लाको लागि अँध्यारो अध्यायको रूपमा सुरु भएको थियो, तर अब ती दिनहरू पछाडि जानेछन्।”