प्रकाशित मिति : चैत्र ३१, २०८१ आईतबार
अमेरिकी राष्ट्रपति डोनाल्ड ट्रम्पको दोस्रो कार्यकालको पहिलो वर्षमा उनको प्रशासनले आप्रवासन नीतिलाई कडा बनाउँदै एक वर्षमा १० लाख आप्रवासीहरूलाई निर्वासन गर्ने महत्त्वाकाङ्क्षी लक्ष्य राखेको छ। चार जना वर्तमान र पूर्व सङ्घीय अधिकारीहरूका अनुसार यो योजना निजी छलफलहरूमा बारम्बार उल्लेख भएको छ।
यो लक्ष्यले विगतका तथ्यांकहरूलाई उछिन्ने देखिन्छ, किनभने पूर्व राष्ट्रपति बराक ओबामाको कार्यकालमा वार्षिक अधिकतम ४ लाखभन्दा बढी निर्वासन भएको थियो। तर, परिचय खुलाउन नचाहने अधिकारीहरूले यो सङ्ख्या कसरी गणना गरिएको छ भन्ने स्पष्ट नभएको बताएका छन्। विश्लेषकहरूले बजेट, कर्मचारी अभाव र आप्रवासीहरूको अदालती सुनुवाइको अधिकारका कारण यो लक्ष्य अवास्तविक भएको बताएका छन्।
ह्वाइट हाउसका सल्लाहकार स्टीफन मिलरले डिपार्टमेन्ट अफ होमल्याण्ड सेक्युरिटी र अन्य निकायहरूसँग दैनिक रणनीति बनाइरहेका छन्। एक रणनीति भनेको १४ लाख आप्रवासीहरूमध्ये केहीलाई निर्वासन गर्नु हो, जसलाई अन्तिम निर्वासन आदेश प्राप्त भए पनि उनीहरूको देशले स्वीकार नगर्दा निर्वासन हुन सकेको छैन। प्रशासनले तेस्रो देशहरूमा आप्रवासी पठाउन ३० देशहरूसँग वार्ता गरिरहेको छ, जसमा मेक्सिको, कोस्टा रिका, पानामा र हालै रुवान्डा पनि सामेल छन्।
ह्वाइट हाउसका डेपुटी प्रेस सेक्रेटरी कुश देसाईले यो लक्ष्यबारे टिप्पणी गर्न अस्वीकार गरे । तर, उनले ट्रम्प प्रशासनलाई मतदाताहरूले सीमा सुरक्षा र आप्रवासन प्रवर्तन सुधार्ने जनादेश दिएको बताए। उनले भने, “हामी आतङ्कवादी र अपराधी गैर कानुनी आप्रवासीहरूको सामूहिक निर्वासनमा केन्द्रित छौँ।”
ट्रम्पले प्रचार अभियानमा लाखौँ आप्रवासी निर्वासन गर्ने प्रतिबद्धता व्यक्त गरेका थिए । साथै, हालका उपराष्ट्रपति जेडी भान्सले १० लाखबाट सुरु गर्न सकिने बताएका थिए। तर, ११० लाख कागजातविहीन आप्रवासीहरूमध्ये धेरैलाई अदालती सुनुवाइको अधिकार छ, जसले प्रक्रियालाई महिनौँ वा वर्षौँ लम्ब्याउन सक्छ।
प्रशासनले एल साल्भाडोरको मेगा(जेल र क्युबाको ग्वान्टानामो बेमा सयौँलाई पठाएर देखावटी कदम चालेको छ, तर यो सङ्ख्या कुल गैर कानुनी आप्रवासीको तुलनामा निकै कम छ। आर्थिक र कानुनी अवरोधहरू, साथै ह्वाइट हाउसको आलोचनाले आप्रवासन अधिकारीहरूको मनोबल घटाएको छ।
“हामीले १० लाख निर्वासन गर्नुपर्छ भन्ने उनीहरू हाँस्दै भन्छन्,” एक पूर्व अधिकारीले भने। “तर यो लक्ष्य पूरा गर्न गाह्रो छ।”
प्रशासनले यो लक्ष्य हासिल गर्न कांग्रेससँग ठुलो बजेट माग गरेको छ, जसले थप अधिकारी भर्ना, हिरासत सम्झौता र चार्टर उडानहरू व्यवस्थापन गर्नुपर्नेछ। माइग्रेसन पोलिसी इन्स्टिच्युटकी डोरिस मेइस्नरले भनिन्, “निर्वासन प्रक्रिया समय(लाग्दो छ, यो रातारात सम्भव हुँदैन।”
यो योजना अमेरिकी इतिहासको सबैभन्दा ठुलो घरेलु निर्वासन अभियान हुने अपेक्षा गरिएको छ, तर यसको कार्यान्वयनमा ठुलो चुनौतीहरू छन्।