आर्थिक विधेयकमा ट्रम्पले गरे हस्ताक्षर, ४३ दिन लामो अमेरिकी शटडाउन अन्त्य

अमेरिकामा जारी ४३ दिन लामो ऐतिहासिक शटडाउन अन्त्य भएको छ। सङ्घीय सरकार पुनः खुला गर्ने आर्थिक विधेयकमा राष्ट्रपति डोनाल्ड ट्रम्पले हस्ताक्षर गरेपछि ४३ दिनको ऐतिहासिक सङ्घीय सरकार बन्द अन्त्य भएको हो।

यसअघि प्रतिनिधि सभाले २२२ मत पक्षमा र २०९ मत विपक्षमा दिँदै आर्थिक विधेयक प्रस्ताव पारित गरेको थियो।

यो सम्झौता रिपब्लिकन र सिनेटका केन्द्रीय डेमोक्र्याट नेताहरूबीच सहमति भएपछि भएको हो। सहमतिले सरकारलाई सन् २०२६ को आर्थिक वर्षको अन्त्यसम्म सञ्चालनमा राख्ने सुनिश्चित गरेको छ।

यो सम्झौताले ट्रम्प प्रशासनले बन्द अवधिमा गरेको हजारौँ सङ्घीय कर्मचारीहरूको बर्खास्ती उल्टाउनेछ। अब सरकारी कर्मचारीहरूले तलब पाउनेछन्। लाखौँ अमेरिकीहरूले भर गरिरहेका खाद्य तथा पोषण सेवा पनि पुनः सुरु हुनेछन्।

चार दिनको तीव्र राजनीतिक छलफलपछि, आठ जना सिनेट डेमोक्र्याटहरूले आफ्नो दलभन्दा बाहिर गएर रिपब्लिकनहरूसँग सम्झौता गरेका थिए ।  किनकि बन्दको आर्थिक असर अमेरिकामा गहिरिँदै गएको थियो।

यस सम्झौताले डिसेम्बरको सुरुवातमा सिनेटमा ‘ओबामाकेयर’ अनुदानको म्याद समाप्त हुनुअघि पुनः मतदान गर्ने ग्यारेन्टी दिएको छ।

तर, अनुदान विस्तारका लागि मत पुग्ने सम्भावना कम रहेको विश्लेषकहरूको भनाइ छ। यसले डेमोक्र्याटिक पार्टीभित्र असन्तुष्टि बढाएको छ।

गैर-डेमोक्र्याट सांसदहरूले स्वास्थ्य बीमा प्रिमियम बढ्ने डरले विधेयकको विरोध गरेका छन्।

तर छ जना डेमोक्र्याट सांसदहरूले भने सरकार खुलाउन समर्थनमा मतदान गरेका छन्।

रिपब्लिकन सभामुख माइक जोन्सनले आफ्ना अधिकांश सांसदलाई प्रस्ताव समर्थन गर्न राजी गराएका थिए।

यद्यपि केही सदस्यहरू रिपब्लिकनहरूले थपेको विवादास्पद प्रावधानप्रति असन्तुष्ट थिए।

उक्त प्रावधानले सांसदहरूलाई बाइडेन शासनकालको न्याय मन्त्रालयको फोन अभिलेख जाँचबारे मुद्दा दायर गर्ने अधिकार दिएको छ।

अब सरकार खुलेसँगै प्रतिनिधि सभा र सिनेट दुवैमा व्यस्त सत्र सुरु हुनेछ।

आगामी चार हप्ताभित्र ओबामाकेयर कर छुटको म्याद सकिँदैछ। ट्रम्पले त्यसलाई पुनः संरचना गर्ने प्रस्ताव अघि सारेका छन्। जसले स्वास्थ्य बीमामा ठूलो राजनीतिक सङ्घर्ष ल्याउने सम्भावना छ।

त्यसका अतिरिक्त फार्म बिल, ऊर्जा कर छुटहरू, र अन्य महत्त्वपूर्ण आर्थिक विधेयकहरू पनि आगामी हप्ता निर्णायक बन्ने देखिएका छन्।