प्रकाशित मिति : १४ चैत्र २०८२, शनिबार
अमेरिकी विवादास्पद यौनकाण्डका रूपमा चिनिएको जेफ्री एपस्टिन प्रकरणका पीडितलाई बैंक अफ अमेरिकाले करिब ७३ मिलियन डलर क्षतिपूर्ति तिर्नुपर्ने भएको छ।
बैंक अफ अमेरिकाले जेफ्री एपस्टिनका पीडितहरूको तर्फबाट दायर गरिएको मुद्दामा ७२.५ मिलियन डलर क्षतिपूर्ति दिने सम्झौता गरेको हो। पीडितहरूले बैंकले एपस्टिनको यौन तस्करी सञ्चालनलाई सहयोग गरेको आरोप लगाएका थिए।
यो सामूहिक मुद्दा गत अक्टोबरमा फ्लोरिडाकी एक महिलाले दायर गरेकी थिइन्। उनले सन् २०११ देखि २०१९ सम्म कम्तीमा १०० पटक एपस्टिनबाट यौन दुर्व्यवहार भोगेको दाबी गरेकी छन्। एपस्टिनको व्यापारिक टोलीको निर्देशनमा उनले बैंक अफ अमेरिकामा दुईवटा खाता खोलेकी थिइन्।
मुद्दामा बैंकसँग एपस्टिनको यौन तस्करीबारे पर्याप्त जानकारी भए तापनि बैंकले नाफालाई प्राथमिकता दिएको आरोप लगाइएको छ। अदालतमा पेस गरिएका कागजातमा बैंक अफ अमेरिकाले यस सम्झौतामार्फत कुनै दोष वा गलत काम स्वीकार नगरेको स्पष्ट पारेको छ।
यो सम्झौता यस महिनाको सुरुमा भएको भए तापनि यसको विवरण न्युयोर्कस्थित संघीय अदालतमा कागजात दर्ता भएपछि मात्र सार्वजनिक भएको हो। अब यसलाई न्यायाधीशले अनुमोदन गर्न बाँकी छ। पीडितहरूका पक्षका वकिल सिग्रिड म्याककाउलीले यसलाई न्याय प्राप्त गर्ने दिशामा अर्को महत्त्वपूर्ण कदम भएको बताएकी छन्।
यसअघि जेपीमोर्गन चेस र डोइचे बैंकले पनि यस्तै मुद्दामा क्रमशः २९० मिलियन र ७५ मिलियन डलर तिर्न सहमति जनाएका थिए। “जेन डो” का नाममा दायर गरिएको मुद्दामा उनको बैंक खातामा अत्यन्त असामान्य वित्तीय गतिविधि भएको उल्लेख गरिएको छ, जुन एपस्टिनको टोलीले प्रयोग गरेको बताइएको छ।
उनले सन् २०११ मा रुसमा एपस्टिनलाई भेटेको र सन् २०१९ मा जेलमा उनको मृत्यु नभएसम्म आफू उनको नियन्त्रणमा रही यौन दुर्व्यवहारको सिकार भएको बताएकी छन्।
मुद्दामा अर्बपति लियोन ब्ल्याकले एपस्टिनलाई कर तथा सम्पत्ति योजनासम्बन्धी परामर्शका लागि १५० मिलियन डलरभन्दा बढी रकम बैंक अफ अमेरिकाको खातामार्फत भुक्तानी गरेको पनि उल्लेख छ।
एपोलो ग्लोबल म्यानेजमेन्टका सह-संस्थापक ब्ल्याकले एपस्टिनसँगको सम्बन्धका कारण पदबाट राजीनामा दिएका थिए, तर उनले कुनै गलत काम नगरेको बताएका छन्। बैंक अफ अमेरिकाले यसअघि आफूले सामान्य बैंकिङ सेवा मात्र प्रदान गरेको र आरोपहरू आधारहीन रहेको भन्दै मुद्दा खारेज गर्न आग्रह गरेको थियो।