प्रकाशित मिति : जेष्ठ ३१, २०८२ शनिबार
सिरियाका पूर्व राष्ट्रपति बशर अल असदका निकट सहयोगी मेजर जनरल बासम अल हसनले असदले अमेरिकी पत्रकार अष्टिन टाइसको हत्या आदेश दिएको खुलासा गरेका छन ।
अमेरिकी पत्रकार टाइसको अपहरण र त्यसपछि उनको हत्या भएको थियो । अल हसन पूर्व राष्ट्रपति असदको रिपब्लिकन गार्डका पूर्व कमाण्डर र राष्ट्रिय रक्षा बलका प्रमुख थिए ।
२०१२ मा टाइसको अपहरणपछि उनलाई थुनेको स्थानका प्रमुख पनि उनी थिए । उनले लिवानमा अमेरिकी अधिकारीहरूसँग कम्तिमा तीन पटक भेट गरेका थिए । जुन भेट एक पटक अमेरिकी दूतावासमा पनि भएको बताइएको छ।
अल हसनका अनुसार उनले असदलाई टाइसको हत्या नगर्न आग्रह गरेका थिए । तर असदले आदेश दिएका थिए र त्यो आदेश कार्यान्वयन भएको थियो । अल हसनले टाइसको शवको सम्भावित स्थान पनि बताएको बताएका छन् ।
अल हसनका दाबीहरूको सत्यता पुष्टि गर्न अमेरिकी अधिकारीहरूले अनुसन्धान जारी राखेका छन् । अल हसनलाई बेलायत, युरोपियन युनियन, क्यानडा र अमेरिकाले प्रतिबन्ध लगाएका छन् ।
अल हसनको दाबीमा असदले प्रत्यक्ष हत्या आदेश दिएको कुरामा पश्चिमी गुप्तचर निकायहरू शंका व्यक्त गरेका छन् । किनकि असदले यस्ता कार्यहरूबाट आफूलाई टाढा राख्ने प्रयास गरेका छन् ।
अष्टिन टाइस पूर्व अमेरिकी मरीन र स्वतन्त्र पत्रकार थिए । २०१२ मा दमास्कस नजिकैको डारयामा रिपोर्टिङ गर्दै गर्दा अपहरण भएका थिए ।
उनको अन्तिम भिडियो अपहरणपछि केही हप्ता पछि सार्वजनिक भएको थियो । जसमा उनी आँखा पट्टी बाँधिएको र बन्दी बनाइएको अवस्थामा देखिएका थिए । अल हसनका दाबीले टाइसको अवस्थाबारे नयाँ आशा र चिन्ता दुवै ल्याएको छ ।
अल हसनको खुलासाले अष्टिन टाइसको अपहरण र त्यसपछि उनको हत्यासम्बन्धी नयाँ जानकारी ल्याएको छ । जसले यस घटनामा संलग्न व्यक्तिहरूको जिम्मेवारी निर्धारण गर्न महत्त्वपूर्ण भूमिका खेल्न सक्छ ।