प्रकाशित मिति : जेष्ठ २५, २०८२ आईतबार
अष्ट्रेलियाका व्यापार तथा पर्यटन मन्त्री डन फारेलले अमेरिकी राष्ट्रपति डोनाल्ड ट्रम्पको ‘अन्यायपूर्ण’ कर नीतिको निन्दा गर्दै अस्ट्रेलियाले अमेरिकामाथिको निर्भरता घटाउँदै अन्य देशहरूसँग स्वतन्त्र व्यापार सम्झौता विस्तार गर्नेतर्फ दबाब दिन थालेको बताएका छन्।
यद्यपि अस्ट्रेलिया अमेरिकाको नजिकको रणनीतिक साझेदार हो, ट्रम्प प्रशासनको विश्वव्यापी कर नीतिअनुसार अमेरिकामा निर्यात गरिने सामानमा १० प्रतिशतसम्म, स्टिल र एल्युमिनियममा ५० प्रतिशतसम्म कर लगाइएको छ।
“म आशावादी छु—विश्वका स्वतन्त्र र निष्पक्ष व्यापारमा विश्वास गर्ने राष्ट्रहरूले अमेरिकी नीति जेसुकै भए पनि आपसी व्यापारको विविधिकरण गर्न स्वतन्त्र व्यापार सम्झौतामा सहमति जनाउन सक्छन्,” फारेलले स्काई न्यूजसँगको कुराकानीमा भने।
पेरिसमा आयोजित विश्व व्यापार सङ्गठन, आर्थिक सहयोग तथा विकास सङ्गठन र अन्य देशहरूसँगको हालैको वार्तापछि उनले अस्ट्रेलिया संरक्षणवाद रोक्न र निष्पक्ष व्यापारलाई प्रवर्द्धन गर्न प्रतिबद्ध रहेको बताए।
फारेलका अनुसार अस्ट्रेलिया र अमेरिकाबीचको वार्षिक व्यापार करिब १०० अर्ब अष्ट्रेलियाली डलर (झण्डै ६५ अर्ब अमेरिकी डलर) बराबरको छ, जसमा अस्ट्रेलियाले अमेरिकी सामान बढी आयात गरेको छ।
गत साता उनले अमेरिकी समकक्षी जेमिसन ग्रीरसँग अस्ट्रेलियाबाट हुने निर्यातमा गरिएको शुल्कप्रति असन्तुष्टि जनाएका थिए। “मैले स्पष्ट भनेँ—अमेरिकाले अस्ट्रेलियामाथि लगाएका करहरू अनुचित छन्,” उनले भने।
“हामी केही होइन, सबैजसो यस्ता कर हटाउन चाहन्छौं,” उनले जोड दिए।
यसैबीच, युरोपेली संघले गत महिना युक्रेन युद्ध र अन्य विश्वव्यापी संकटप्रति साझा अन्तर्राष्ट्रिय प्रतिक्रिया विकास गर्न अस्ट्रेलियासँग रक्षा साझेदारी विस्तार गर्ने प्रयास भइरहेको जनाएको थियो।
