प्रकाशित मिति : आश्विन २०, २०८२ मंगलबार
एआईको प्रयोगबाट बनाइएको तस्वीर ।
अमेरिका आउने नेपाली भिजिटरहरुको संख्या अगस्तमा यो बर्षकै उच्च देखिएको पनि गतबर्षको अगस्तसँग तुलना गर्दा भने ३७ प्रतिशतले गिरावट आएको छ । अगस्तमा ५ हजार ८ सय ७९ जना नेपालीहरु भिजिटरका रुपमा अमेरिका प्रवेश गरेको अमेरिकी सरकारको डिपार्टमेन्ट अफ कमर्शको तथ्यांकले देखाएको छ ।
जुलाईमा ३८४६, जुनमा ३१५१, मेमा ३८७३, अप्रिलमा २५५३, मार्चमा २४८०, फरबरीमा १८७३ र जनवरीमा ४०५१ जना नेपालीहरु भिजिटरका रुपमा अमेरिका प्रवेश गरेका थिए । गतबर्षको सोही महिनाहरुको तुलना गर्दा जनवरीदेखि अगस्तसम्म हरेक महिना नेपाली भिजिटरको संख्यामा ११ प्रतिशतदेखि ३७ प्रतिशतसम्म गिरावट आएको छ । यो गिरावट सन् २०२४ को डिसेम्बरदेखि नै आउन थालेको देखिन्छ ।
खासगरी २०२१ को अप्रिलदेखि अमेरिकामा आउने नेपाली भिजिटरहरुको संख्या हरेक महिना अघिल्लो बर्षको महिनासँग तुलना गर्दा बृद्धि नै देखिएको थियो । यो बृद्धि सन् २०२४ को अगस्तसम्म नै देखिएको थियो । त्यसपछिका ३ महिना अघिल्लो बर्षका सोही महिनाको तुलनामा लगभग उस्तै देखिएपनि डिसेम्बरदेखि भने गिरावट आएको हो ।
हरेक बर्षको अगस्तमा अमेरिकामा भिजिटरका रुपमा आउने नेपालीहरुको संख्या भने अन्य महिनाका तुलनामा उच्च नै रहने गरेको छ । सन् २०२४ को अगस्तमा पनि ९३३९ नेपालीहरु भिजिटरका रुपमा अमेरिका आएका थिए भने उक्त संख्या गतबर्षका अरु सबै महिनाको तुलनामा उच्च रहेको थियो ।
सन् २०२३ को अगस्तमा ६०१० जना नेपालीहरु भिजिटरका रुपमा अमेरिका आएका थिए । यो संख्या पनि २०२३ का अन्य महिनाका तुलनामा बढी हो । २०२२ को अगस्तमा पनि ४९३७ जना नेपालीहरु भिजिटरका रुपमा अमेरिका आएका थिए भने उक्त बर्षको अन्य महिनाका तुलनामा यो संख्या सबैभन्दा उच्च थियो ।
डिपार्टमेन्ट अफ कमर्शको यो तथ्यांकमा एकरातभन्दा बढी अमेरिकामा बस्नेगरी आउने र निश्चित भिसा श्रेणीमा पर्नेहरुलाई भिजिटरका रुपमा बर्गिकरण गरिदै आएको छ भने जारी आई ९४ को संख्याका आधारमा भिजिटरको संख्या निर्धारण गर्ने गरिएको छ । त्यसैले विगतमा अमेरिका आएर अमेरिकाबाहिर गएर फर्कनेहरु र पहिलोपटक अमेरिका प्रवेश गर्नेहरुको विवरण यसमा अलग गरिएको छैन ।
यद्यपी यो संख्यामा बी श्रेणीका भिजिटर भिसा, एफ र एम श्रेणीका विद्यार्थी भिसा, आई श्रेणीका मिडिया भिसा र ई श्रेणीका भिसाहरुलाई समेटिएको छ । अमेरिकामा काम गर्नका लागि आउने गैर आप्रवासी भिसा श्रेणीहरुलाई यसमा समावेश गरिएको छैन । सबै प्रकारका यातायात र पोर्ट अफ इन्ट्रीबाट आउनेहरुलाई यो संख्यामा समावेश गरिएको छ ।
२०२४ मा जनवरीदेखि डिसेम्बरसम्म यसरी भिजिटरका रुपमा अमेरिका प्रवेश गर्ने नेपालीहरुको संख्या ४८ हजार ५ सय २५ रहेको थियो । यो संख्या विगतका कुनै पनि बर्षहरुको तुलनामा उच्च हो । २०२५ को ८ महिनामा २७ हजार ७ सय ६ जना नेपाली भिजिटरहरु अमेरिका प्रवेश गरका छन् । २०२३ मा नेपालीहरुको यो संख्या ४२ हजार ४ सय ७२ र २०२२ मा ३० हजार १ सय १६ थियो । २०२१ मा १८ हजार ४३६ नेपाली भिजिटरका रुपमा अमेरिका आएकोमा २०२० मा कोरोना महामारीका कारण यो संख्या जम्मा ८ हजार १ सय ३४ थियो ।
