प्रकाशित मिति : माघ १, २०८१ मंगलबार
अमेरिकाले क्यूबालाई आतंकवादी देशको सूचीबाट हटाएको छ । राष्ट्रपति जो बाइडनले मंगलवार क्यूबालाई आतंकवादको राज्य प्रायोजकको रूपमा रहेको अमेरिकी सूचीबाट हटाउने निर्णय गरेका छन्। यो निर्णय कैदी मुक्ती सम्झौताअन्तर्गत गरिएको बताइएको छ ।
क्यूबाले ५५३ कैदीलाई रिहा गर्ने घोषणा गरेको छ । जसमा विभिन्न अपराधहरूको आरोपमा थुनामा रहेका व्यक्तिहरू मुक्त हुनेछन ।
यीमध्ये चार वर्षअघि भएका विरोध प्रदर्शनमा सहभागी भएका व्यक्तिहरू पनि समावेश हुने अपेक्षा गरिएको छ ।
राष्ट्रपति डोनाल्ड ट्रम्पले २०२१ मा आफ्नो पहिलो राष्ट्रपति कार्यकालको अन्तिम दिनहरूमा क्यूबालाई पुनः आतंकवादुको राज्य प्रायोजकको रूपमा सूचीबद्ध गरेका थिए ।
जसका कारण अमेरिकी आर्थिक सहायता र हतियार निर्यातलाई क्यूबामाथी प्रतिबन्ध लगाइएको थियो। क्यूबाले भनेको छ कि बाइडनको यो कदम सही दिशामा रहेको छ । यद्यपि यसको सीमित प्रकृति छ।
क्यूबाले सयौँ कैदीहरू क्रमिक रूपमा रुपमा रिहा हुने बताएको छ । यो सम्झौताले २०२१ मा क्यूबामा भएको ठूलो विरोध प्रदर्शनमा सहभागी भएका कैदीहरूको रिहाइको आशा गरिएको छ ।
ती विरोध प्रदर्शनहरू क्यूबाको आर्थिक मन्दीको विरोधमा भएका थिए। क्यूबा हाल अमेरिकाको आतंकवादको राज्य प्रायोजकको सूचीमा उत्तर कोरिया, सिरिया र इरानसँगै रहेको छ।
यसको अर्थ, अमेरिकी नजरमा क्यूबाले अन्तर्राष्ट्रिय आतंकवादको क्रियाकलापहरुलाई बारम्बार समर्थन गर्दै आएको देश मानिन्छ।
२०१५ मा राष्ट्रपति बराक ओबामाले क्यूबालाई यस सूचीबाट हटाए पछि, ट्रम्पले फेरि क्यूबालाई यस सूचीमा समावेश गरेका थिए ।
क्यूबाले भेनेजुएलाका नेता निकोलस मादुरोको समर्थन गरेको आरोप अमेरिकाले क्यूबामाथि लगाएको थियो ।
त्यतिबेला क्यूबाले यो कदमलाई चिन्ताजनक, द्वैध मापदण्ड र राजनीतिक अवसरवादको क्रियाकलाप भनेको थियो।
बाइडनले आफ्नो योजना कांग्रसलाई सूचित गर्नेछन् । ट्रम्प २० जनवरीमा कार्यालयमा फर्केपछि यस निर्णयलाई उल्टाउनेछन् कि छैनन् भन्ने यकिन भने छैन ।
राष्ट्रपतिमा निर्वाचित ट्रम्पको परराष्ट्र मन्त्रीको उम्मेदवार मार्को रुबियोले क्यूबामा प्रतिबन्धको पक्षमा लामो समयदेखि वकालत गर्दै आएका छन् । उनका परिवार १९५० को दशकमा क्यूबा छोडेर अमेरिकीमा बसोबास गर्न पुगेका थिए ।